काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले आफूलाई सांसद पदबाट गरिएको निलम्बन फुकुवा गर्न माग गर्दै सभामुख देवराज घिमिरेलाई निवेदन दिएका छन् ।
शुक्रबार सिंहदरबारस्थित सभामुखको कार्यकक्षमा पुगेर लामिछानेले निलम्बन फुकुवाका लागि निवेदन दिएका हुन् । निवेदनमा अदालतले पुर्पक्षका लागि थुनामा पठाउने निर्णय गरे मात्र सांसद पद निलम्बन हुने प्रावधान भए पनि आफूलाई त्यसबिना नै निलम्बन गरिएको भन्दै पुनर्बहाली गर्न आग्रह गरिएको छ ।
संसद् सचिवालयले गत पुस ८ गते सहकारी ठगी लगायतका आरोपमा जिल्ला अदालतमा विचाराधीन मुद्दालाई आधार मानेर लामिछानेलाई सांसद पदबाट निलम्बन गरेको थियो । तर, उनले कानुनी प्रक्रियामा रहेका मुद्दालाई कारण बनाएर जनप्रतिनिधिको पद खोस्न नहुने दाबी गरेका छन् ।
लामिछानेको यो निवेदनबारे सभामुखले के निर्णय लिन्छन् भन्ने विषयमा राजनीतिक वृत्तमा चासो बढेको छ । रास्वपाका नेताहरूले यसलाई अन्यायपूर्ण निर्णय भन्दै तत्काल निलम्बन फुकुवाको माग गरिरहेका छन् ।
