दुई पटकको पुर्व च्याम्पियन उरुग्वे समूह विजेता बन्दै जारी विश्वकपको दोस्रो चरण पुगेको छ। समूह ‘ए’ अन्तर्गत आफ्नो तेस्रो तथा अन्तिम खेलमा सोमबार घरेलु टोली रुसलाई ३-० गोलले हराएको उरुग्वे लगातार तेस्रो जित हात पार्दै नकआउट चरण पुगेको हो।
सामारा एरिनामा घरेलु टोलीले खेलको दशौं मिनेटमै गोल खाएको थियो । यसअघि साउदी अरवबिरुद्धको जितमा गोल गरका लुइस स्वारेजले आज पनि सुरुआती गोल गरेका थिए ।
२३औं मिनेटमा उपहार गोलमार्फत उरुग्वेले अग्रता दोब्बर बनायो । डिएगो स्वारेजले डिबक्स बाहिरबाट गरेको शशक्त प्रहार क्लियर गर्न लाग्दा रुसका डेनिस चेरिचेभले आफ्नै पोष्टमा गोल गर्न पुगेका थिए ।
खेलको ३६औैं मिनेटमा रुस १० खेलाडीमा समेटियो । उसका डिफेण्डर इगर स्मोल्निकोभ दोहोरो पहेँलो कार्ड खाँदै मैदान बाहिरिन बाध्य भए । त्यसपछि रुसले रक्षात्मक खेल्न बाध्य भयो ।
तर, खेलको अन्तिम समयमा एडिन्सन काभानीले गोल गर्न सफल भए । जारी विश्वकपमा पीएसजी फरवार्ड काभानीको यो पहिलो गोल हो ।
उरुग्वेले समूह ‘बी’को उपविजेता र रुसले समूह ‘बी’को विजेतासँग प्रतिस्पर्धा गर्ने छ। समूह ‘बी’मा दुई खेलपछि पोर्चुगल र स्पेनको समान चार अंक छ। इरानको तीन अंक छ भने मोरक्कोले अंक जोड्न सकेको छैन। समूहको अन्तिम खेलमा सोमबार राती पोर्चुगलले इरान र स्पेनले मोरक्कोको सामना गर्दै छ।
