लियोनल मेस्सीकाे अर्जेन्टिना विश्वकपको नवप्रवेशी टोली आइसल्याण्डसँग बराबरीमा रोकिएको छ । शनिबार साँझ मस्कोको स्पार्टाक रंगशालामा भएको समूह डीको पहिलो खेलमा विश्वकपको उपाधि दावेदार टोली अर्जेन्टिनालाई आइसल्याण्डले बराबरीमा रोकेको हो ।
सर्जियो एग्युरोले पहिलो हाफको १९औं मिनेटमै अर्जेन्टिनालाई अग्रता दिलाएका थिए । तर, त्यसको चार मिनेटपछि नै अर्जेन्टिनी डिफेण्डरहरुको कमजोरीको फाइदा उठाउँदै आइसल्याण्डले गोल गर्न सफल भयो । विश्वकपमा पहिलो सहभागिता र पहिलो खेलमै आइसल्याण्डका लागि अलफ्रेड फिनबोगासनले गोल गरेका थिए । कप्तान मेसीले ६३ औं मिनेटमा पाएको पेनाल्टी चुकाएपछि पहिलो खेलमै अर्जेन्टिना जितबिहिन हुन पुग्यो । पछिल्ला खेलमा राम्रो प्रदर्शन गरेको आइसल्याण्डलाई दवावमा राखेपनि अग्रता जोगाउन नसक्दा जितविहिन हुन पुगेको हो ।
