मेष (चु, चे, चो, ला, लि, लु, ले, लो, अ) याे साताकाे भाग्यादेश
सातौं भावमा रहेको चन्द्रमाका साथमा सुरु भएको यस सातामा तपाईंको समय मनोरञ्जनपूर्ण रहनेछ । नयाँ ज्ञान सिक्ने मौका छ । व्यावसायिक यात्राको सम्भावना छ । दाम्पत्य जीवन सुखद तथा समृद्ध बन्ने देखिन्छ । आम्दानी प्रशस्तै बढ्नेछ । नयाँ सवारी साधन प्राप्तिको योग पनि छ । परोपकार र धार्मिक क्षेत्रमा लगानी गरेमा राम्रो प्रतिफल पाइनेछ । साथीभाइसित भेटघाट हुनुका साथै मनोरञ्जनात्मक काममा संलग्न भइने छ । आम्दानीमा कमी आउने छैन । प्रतिस्पर्धीहरूमाथि विजय प्राप्त हुने छ । धैर्यधारण गरी परिश्रम गर्ने समय हो । विगतमा गरिएको श्रमको समुचित मूल्याङ्कन हुनेछ । तर सोमबारदेखि बुधवारसम्म अष्टम भावमा चन्द्रमा रहने हुँदा झैझगडा र मुद्दामामिलाभन्दा टाढै बस्नु उचित हुनेछ । उक्त अवधिमा यात्रा घातक बन्न सक्छ, धेरै टाढा नजानु होला । बोलीमा संयमता अपनाउनु होला, आफूले भनेको कुराले विपरीत अर्थ प्रदान गर्न सक्छ । रोगव्याधि र चोटपटकबाट समेत जोगिने समय हो ।
बृष (इ, उ, ए, ओ, बा, बि, बु, बे, बो) याे साताकाे भाग्यादेश
मिश्रित प्रभाव रहने साता छ, त्यसैले वर्तमान समयलाई धैर्यता, संयमता र सोचविचार गरी उपयोग गर्नु बुद्धिमत्ता हुनेछ । सुरुमा तपाईंको राशिबाट छैटौं भावमा चन्द्रमा रहनेछ, प्रतिस्पर्धी र शत्रुहरूको चलखेल बढ्नाले केही चुनौती र अपठ्याराको सामना गर्नुपर्छ । साताको उत्तरार्द्धमा चन्द्रमा आठौं भावमा पुग्ने भएकाले खानपानमा नियन्त्रण गर्नु बेस हुनेछ, सानो लापरवाहीले स्वास्थ्यमा नकारात्मक असर पर्न सक्छ । मनोरञ्जनात्मक क्रियाकलापबाट हानि पुग्ने सम्भावना छ । तर सोमवारदेखि बुधवारसम्म हाँसखेल, भ्रमण र मनोरञ्जनका क्रममा समय बित्नेछ । घरपरिवारका सदस्य र साथीभाइसँग मतभिन्नता भएपनि अन्त्यमा उनीहरू सकारात्मक देखिने छन् । जीवनसाथी वा आमाको सल्लाहमा गरिएको काममा सफलता प्राप्त हुनेछ । उता साताको अन्त्यमा धार्मिक तथा परोपकारजन्य क्रियाकलापबाट प्रतिष्ठा पाइनेछ । रोकिएको काम बनेको समाचार सुन्न पाउने सम्भावना समेत छ । आफन्त वा साथीभाइले निस्वार्थ भावले सहयोग गर्नेछन् । नयाँ ज्ञान प्राप्त हुनेछ ।
मिथुन (का, कि, कु, घ, ङ, छ, के, को, ह) याे साताकाे भाग्यादेश
साताको प्रारम्भमा सन्तति पक्ष र भाइबहिनीले खुसीको वातावरण सिर्जना गर्नेछन् । लेखन, प्रकाशन र ज्ञानगुनका क्षेत्रमा सक्रियता बढ्ने छ । बौद्धिक र सृजनात्मक सफलता मिल्नेछ । पारिवारिक जीवन सामान्य र सन्तोषप्रद रहने छ । सोमबारदेखि वुधवारसम्म अनुकूल समय रहने छैन, मनमा अशान्ति र छटपटी व्याप्त हुने छ । अनावश्यक र दिक्कलाग्दो यात्रा हुन सक्छ । भोगविलासमा मन जानेछ । स्वास्थ्यका दृष्टिकोणले यो राम्रो समय होइन । साताको उत्तरार्द्ध अनुकूल देखिन्छ, कृषि, पशुपालन र दुग्धजन्य पेसामा संलग्न व्यक्तिहरुले राम्रो आर्थिक लाभ गर्नेछन् । प्रायः सबैले प्रणयसम्बन्ध र रतिरागका लागि समय छुट्याउने छन् । आनन्द र रमणीयताका लागि समय र धन खर्च हुन सक्छ । तर आगामी शनिवारका दिन ढिलो गरी कार्यसम्पादन हुने समय छ । अनावश्यक यात्रा तथा गुप्त र मानसिक रोगले सताउन सक्छ । किसिमकिसिमका समस्यासित जुध्नु पर्ने परिस्थिति छ । लेनदेनमा विवाद हुनेछ । व्यवहारिक हानी हुनेछ होस राख्नुहोला ।
कर्कट (हि, हु, हे, हो, डा, डि, डु, डे, डो) याे साताकाे भाग्यादेश
घरपरिवारका लागि यस साताको अधिकतम समय खर्च हुनेछ । आर्थिक पक्ष पनि कमजोर देखिन्छ, खर्चको मात्रा ह्वात्तै बढ्न सक्छ । प्रतिफल प्राप्त नहुने क्षेत्रमा लगानी हुनसक्छ । चिताएको काममा अप्ठ्यारा र चुनौतीको सामना गर्नुपर्छ । तर सोमबारपछि सन्ततिपक्षबाट खुसीको समाचार प्राप्त हुने छ । आफन्तले प्रशंसा गर्नेछन् । मन प्रफुल्ल र उत्साही बन्ने छ । घरपरिवारमा रमाइलो जमघट हुने छ । गर्न लागेको काममा सबैले साथ दिनेछन् । शत्रुहरू पराजित हुनेछन् । यश, सम्मान र प्रतिष्ठा प्राप्त हुनेछ । विपरीतलिङ्गीबाट आवश्यक सहयोग मिल्नेछ । बिहीबार र शुक्रवार स्वास्थ्यमा समस्या देखिन सक्छ, विवाद र झैझगडाबाट फाइदा हुने सम्भावना छैन । सहयोगी हातहरू पछि हट्न सक्छन् । अनावश्यक र दिक्कलाग्दो यात्रा हुन सक्छ । शरीरमा आलस्य जाग्नेछ । काम गर्न जाँगर लाग्दैन । तर शनिवारका दिन प्रशासनिक र राज्यपक्षबाट हुनुपर्ने काममा सफलता प्राप्त हुनेछ । शुभसमाचारको आगमनले मन प्रसन्न रहने समय छ ।
सिंह (मा, मि, मु, मे, मो, टा, टि, टु, टे) याे साताकाे भाग्यादेश
प्रारम्भमा पराक्रम र उत्साह बढ्नेछ । उद्योग र व्यापारमा विशेष फाइदाको योग छ । सहयोगीहरूले साथ दिनेछन् र काममा सोचेजस्तै सफलता मिल्नेछ । कृषिकर्म र व्यावसायिक काममा भने केही चुनौतीको सामना गर्नुपर्छ । सोमबारदेखि बुधवारसम्म घरपरिवार र छरछिमेकमा असमझदारी बढ्न सक्ने समय हो । सामाजिक मर्यादामा आँच आउन सक्छ । इष्टमित्र र घरपरिवारबाट पनि आवश्यक सहयोग मिल्ने छैन । उता परिश्रम गर्दा पनि सोचेजस्तो उपलब्धी हात पर्ने छैन, मिहिनेत र परिश्रम व्यर्थै खेर जान सक्छ । बिहीबारपछि बौद्धिक र लेखनकार्यमा सफलता प्राप्त हुने योग छ । सन्तति पक्ष र भाइबहिनीले खुसीको वातावरण सिर्जना गर्नेछन् । साथीभाइले तपाईंका सकारात्मक कामको समुचित मूल्याङ्कन गर्नेछन् । मनोरञ्जनका लागि राम्रै समय छ । तर शनिवारका दिन छैटौं भावमा चन्द्रमा रहने भएकाले गरिएका उद्यममा सफलता प्राप्त हुनेछैन । शत्रुले छवि बिगार्ने प्रयास गर्नेछन् । जीवनसाथीसितको सम्बन्धमा नकारात्मकता देखिनसक्छ । सवारी साधनबाटसमेत हानि पुग्नसक्छ ।
कन्या (टो, प, पि, पु, ष, ण, ठ, पे, पो) याे साताकाे भाग्यादेश
धनधान्य र भौतिक सम्पत्ति जुट्ने समय छ । यस सातामा आम्दानी बढ्ने र उठ्नुपर्ने रकम हातलागी हुने समय छ । कृषि तथा पशुधनबाट लाभ लिन सकिने छ, त्यस्तै बन्दव्यापारमा समेत प्रशस्त फाइदा हुने योग छ । गरेका कामबाट राम्रै लाभ हुनेछ । श्रमको उचित मूल्याङ्कन होला । व्यवसायिक क्षेत्र सफल रहने छ, आम्दानीमा कमी आउने छैन । दैनिक कामहरू सन्तोषजनक ढंगले सम्पन्न हुनेछन् । अर्थलाभका अवसर आउने छन् । राजनैतिक चासो पनि बढ्नेछ । तीर्थव्रत तथा देवालयको भ्रमण हुन सक्छ । अध्ययन अध्यापन सफल रहेको छ । साथीभाइ, बन्धुवान्धव र इष्टमित्रबाट राम्रो सहयोग जुटाउन सकिन्छ । सन्तानपक्षबाट राम्रै सरसहयोग प्राप्त हुनेछ । तर बिहीवार र शुक्रवारका दिन प्रतिकूल परिस्थितिले पछ्याउने छ । सानातिना कामको झमेला आउनसक्छ । गरिएको लगानीबाट दीर्घकालीन फाइदा नहुन सक्छ । परिवारमा मतभेद हुनसक्ने समय रहने छ । झैझगडा र मुद्दामामिलाभन्दा टाढै बस्नु उचित हुनेछ ।
तुला (र, रि, रु, रे, रो, ता, ति, तु, ते) याे साताकाे भाग्यादेश
आफ्नै राशिबाट प्रारम्भ भएको यो साता तपाईंका लागि अत्यन्त अनुकूल रहने छ । पारिवारिक सुख मिल्नुका साथै अध्ययन–अध्यापनको क्षेत्रमा प्रगतिको खबर सुन्न पाउनु हुनेछ । आर्थिक पक्ष सुदृढ बन्नेछ । न्यायिक वा प्रतियोगितात्मक क्रियाकलापमा विजय प्राप्त हुनेछ । मनमा दोधारको अवस्था हुनसक्छ । परिवारमा ठूलो जमघट वा धार्मिक सामाजिक कार्य सम्पन्न हुनेछ । उक्त अवसरमा तपाईंको प्रत्यक्ष संलग्नता र भूमिका रहने देखिन्छ । विशिष्ट व्यक्तिले विचारको कदर गर्नेछन्, महत्वपूर्ण कार्य सम्पन्न हुने मौका छ । मानप्रतिष्ठा र सामाजिक मर्यादामा अभिवृद्धि हुनेछ । दार्श्निक र आध्यात्मिक विषयवस्तुप्रति आकर्षित हुनुहुनेछ । भाइबहिनीका तर्फबाट खुसीको खबर प्राप्त हुने सम्भावना समेत छ । व्यावहारिक र सामाजिक जिम्मेबारी थपिनेछ । तर आगामी शनिवार गरेका कामधन्दा र मिहिनेतबाट लाभ हुने सम्भावना छैन । रोकिएको कामधन्दामा प्रगति हुन सक्दैन । आफूले ताके अनुरूप काम नबन्नाले दिक्क लाग्नेछ । मातापिता र मान्यजनको स्वास्थ्यप्रति सचेत रहनु होला ।
बृश्चिक (तो, ना, नि, नु, ने, नो, या, यि, यु) याे साताकाे भाग्यादेश
आर्थिक रूपमा कमजोर समय रहने छ । समाजमा तपाईंका कुरा काट्नेको कमी हुने छैन । बौद्धिक र प्राज्ञिक क्षमताको उपयोग हुन सक्दैन । मनमा विरक्तिको भाव बहन सक्छ । तर सोमबारका दिन राशिमा चन्द्रमा आइपुग्नाले त्यसपछि आफ्नो विचार र योजनालाई रचनात्मक रूप प्रदान गर्ने प्रयास गर्दा राम्रो हुनेछ, यस अवधिमा सुरु गरिएको क्रियाकलापले दीर्घकालिक फाइदा पुग्नेछ । विशिष्ट व्यक्तिलाई प्रभावित तुल्याएर काम बनाउन सकिनेछ । बिहीबारपछि आर्थिक क्षेत्र सबल बन्नेछ । स्वास्थ्यमा सकारात्मक सङ्केत देखिने छ । बन्दव्यापारबाट राम्रो फाइदा लिन सकिन्छ । भौतिक साधनको जोहो हुनाका साथै मनोरञ्जनात्मक क्रियाकलापमा सक्रिय हुने अवसर जुट्ने छ । सुरुमा केही नकारात्मक देखिए पनि समग्रमा जिम्मेबारी वहन गर्नु पर्ने समय रहने छ, उत्साहपूर्वक काम गर्नुहोला । वैदेशिक क्षेत्रबाट लाभ लिने मौका छ । मातापिता र अभिभावक वर्गसँगको सम्बन्धमा सुधार आउने छ । ढिलै भए पनि तपाईंले भने जसरी नै काम सम्पन्न हुनेछ ।
धनु (ये, यो, भ, भि, भु, ध, फा, ढ, भे) याे साताकाे भाग्यादेश
प्रारम्भमा राज्यस्थानमा रहेको चन्द्रमाको प्रभावले सुखद समाचार सुन्न पाइनेछ । स्वास्थ्य सबल रहनेछ र काममा पनि फाइदाको योग छ । पशुपालन तथा कृषि क्षेत्रबाट राम्रो लाभ मिल्ने योग छ । पढाइलेखाइमा प्रगति हुनेछ । बौद्धिक प्रतिस्पर्धामा विजयी भइनेछ । साताको उत्तरार्द्धमा नयाँ योजना कार्यान्वयन गर्ने र दीर्घकालीन योजना बनाउने समय हो । पढाइलेखाइ र ज्ञानगुनका क्षेत्रमा प्रगति हुनेछ । मिष्ठान्न भोजनको अवसर प्राप्त हुने योग छ । गहना, कपडा वा धातुको कुनै वस्तु खरिद गर्दा लाभ प्राप्त हुनेछ । कार्य सफल हुँदै जानेछ । रमाइलो यात्रा हुन सक्छ । पुराना साथीभाइसित भेटघाट हुनसक्छ । तर सोमवारदेखि बुधवारसम्म बाह्रौं भावमा चन्द्रमा रहने हुँदा सट्टापट्टा वा जुवाजन्य क्रियाकलापमा धननाश हुने खतरा छ, सचेत हुनुपर्छ । लामो दूरीको आकस्मिक यात्राको सम्भावना देखिन्छ, तर त्यसबाट सोचेजस्तो लाभ मिल्न सक्दैन । व्यवहारिक खर्चको मात्रा बढ्नेछ । मनमा निराशा र विरक्तिभाव जाग्नसक्छ, सचेत हुनुपर्छ ।
मकर (भो, ज, जि, खि, खु, खे, खो, गा, गि) याे साताकाे भाग्यादेश
कर्मप्रति वफादार र लगनशील भएर अघि बढ्दा हाकेका ताकेका काममा सफल हुने साता छ । हाकिम, मातापिता वा विशिष्ट व्यक्तिको विचारले प्रभावित तुल्याउन सक्छ । नोकरी अथवा व्यवसायसँग सम्बद्ध कुनै ठोस परिणाम देखा पर्नेछन् । तपाईंका सम्पूर्ण उद्यम र परिश्रमको राम्रो प्रतिफल प्राप्त हुनेछ । आर्थिक रूपमा सबल बन्नुहुनेछ, कारोबारमा गतिशीलता आउने छ र व्यवसायबाट लाभ हुनेछ । मायाप्रेमका लागि समय जुट्ने छ । पठनपाठनमा प्रगति हुनेछ । दानपुण्यका लागि असल छ । परिश्रमको प्रतिफल ढिलो गरी प्राप्त हुनेछ, तर यस सप्ताहको उत्तरार्द्धमा मन उत्ताउलो र अधैर्य बन्नसक्छ, संयम हुनु राम्रो हुन्छ । खासगरी बिहीवार र शुक्रवारका दिन यात्रा घातक बन्नसक्छ । अनावश्यक र निरर्थक लगानी बढ्नेछ । आम्दानीका मार्ग अवरुद्ध हुनेछन् । स्वास्थ्य प्रतिकूल रहनेछ । चिन्ता र शङ्काले मन व्याकुल हुनसक्छ । पारिवारिक सहयोग प्राप्त हुँदैन । अतः उक्त अवधिमा चिन्तनमनन र अध्यात्मप्रति आकर्षित हुँदा राम्रो हुनेछ ।
कुम्भ (गु, गे, गो, सा, सि, सु, से, सो, द) याे साताकाे भाग्यादेश
भाग्यभावमा रहेको चन्द्रमाका साथमा साताको सुरुवात भएकाले यो साता कतै लामो दूरीको लाभदायी यात्रा गर्नु छ भने राम्रो हुन्छ । नयाँ काम र जिम्मेवारी हात पार्ने मौका छ । प्राविधिक काममा विशेष सफलता प्राप्त हुने छ साथै आत्मसन्तुष्टि समेत प्राप्त हुनेछ । मातापिता र अभिभावकवर्गको आशीर्वादले काम गर्न सक्छ । आम्दानी बढ्ने र उठ्नुपर्ने रकम हातलागी हुने समय छ । कृषि तथा पशुपालनमा कम र व्यापारमा प्रशस्त फाइदा हुने योग छ । गरेका कामबाट राम्रै लाभ हुनेछ । श्रमको उचित मूल्याङ्कन होला । पढाइमा प्रगति हुनेछ । तर आगामी शनिवारका दिन बन्दव्यापार, श्रममूलक काम, कृषि तथा पशुपालनका क्षेत्रमा सोचेअनुसार लाभ हुनेछैन, धनसङ्ग्रहका क्षेत्रमा बाधा छ, आकस्मिक रूपमा अतिथिको आवाभगत गर्नुपर्ने हुनसक्छ । दैनिक कामकाजमा खर्च बढ्ने छ । झर्कोलाग्दो यात्राको योग समेत छ । साताको अन्तिम दिन बाहेक समग्रमा यो समय विशेष महत्वको समय हुनेछ ।
मीन (दि, दु, थ, झ, ञ, दे, दो, च, चि) याे साताकाे भाग्यादेश
प्रतिकूल समय रहने छ, साताको प्रारम्भमा नै आठौं भावमा चन्द्रमाको उपस्थिति भएकाले यो साता सानातिना काम र घरेलु समस्यामा नै समय व्यतीत हुनेछ । सामान्यतया प्रत्येक काममा बाधाअड्चन आउने र ढिलो गरी कार्यसम्पादन हुने समय छ । सवारी साधन हाँक्दा सचेतता अपनाउनु राम्रो हुनेछ । स्वास्थ्यमा समस्या देखिन सक्छ, खानपान प्रति सतर्कता अपनाउनु पर्छ । सोमबार भाग्यमा चन्द्रमाको प्रवेश हुनेछ, परोपकार र धार्मिक क्षेत्रमा लगानी गरेमा राम्रो हुनेछ । इष्टमित्रले प्रशंसा गर्नेछन् । मानप्रतिष्ठा र सामाजिक मर्यादामा अभिवृद्धि हुनेछ । व्यवसायिक क्षेत्रबाट राम्रो लाभ प्राप्त हुनेछ । साथीहरूसित मनोरञ्जन गर्ने अवसर जुर्नेछ । बौद्धिक प्राज्ञिक गतिविधिमा संलग्न हुनेपर्ने छ । साताको उत्तरार्द्धमा आफ्नो काममा तल्लीन हुनुपर्ने भएकाले समय बितेको पत्तो पाउनु हुन्न, तर श्रमिक, पशुपालक र कृषकले अलि बढी थाकेको अनुभूति गर्नेछन् । शनिवारका दिन कतै लामो दूरीको लाभदायी यात्रा गर्नु छ भने राम्रो हुन्छ ।
-सहप्राध्यापक कृष्णप्रसाद कोइरालाले लेख्नुभएको राशिफल ज्योतिष साथीबाट लिएका हौँ ।
