‘नेपालका कम्युनिष्टहरूलाई दरबारले नै पालनपोषण गरेको हो’ –वरिष्ठ कलाकार नीर शाह

‘नेपालका कम्युनिष्टहरूलाई दरबारले नै पालनपोषण गरेको हो’ –वरिष्ठ कलाकार नीर शाह

वरिष्ठ कलाकार एवं सञ्चारउद्यमी नीर शाहले नेपालका कम्युनिष्ट पार्टीहरू दरबारको पालनपोषणमा हुर्किएको बताएका छन् । पहिले खासै अस्तित्वमा नरहेका कम्युनिष्टहरूलाई राजा महेन्द्रले ०१७ सालपछि मलजल गरेर कांग्रेसविरुद्ध प्रयोग गरेको उनको भनाइ छ ।

पूर्वराजदरबारसँग नातासमेत जोडिएका शाहले पूर्वराजा महेन्द्रलाई अपराधीको संज्ञा दिन पनि पछि परेनन् । महेन्द्रकै अदूरदर्षिताका कारण अहिले मुलुक कम्युनिष्ट अतिवादतर्फ उन्मुख भएको उनको भनाइको आशय थियो । केही वर्षयता नेपाली कांग्रेसमा सक्रिय भएर लागेका शाहले नेपाली कांग्रेस क्षेत्र नं ५ को चुनावी सभालाई सम्बोधन गर्ने क्रममा यस्तो बताएका हुन् । काठमाडौं क्षेत्र नं ५ मा नेपाली कांग्रेसका तर्फबाट उम्मेदवार बनेका डा. प्रकाशशरण महतको चुनावी प्रचारमा व्यस्त शाह आफैँ पनि सो क्षेत्रबाट समानुपातिक सांसदमा सिफारिस भएका थिए । मुलुकमा लोकतन्त्र पक्षधरहरूको जित हुनुपर्नेमा उनको जोड थियो ।

‘लोकतन्त्र बचाउनका लागि कांग्रेसको जित आवश्यक छ,’ शाहले भने, ‘२०१७ सालमा महेन्द्रले कांग्रेसलाई अपदस्त गरेर कम्युनिष्टहरूलाई च्यापे, अहिले तिनै कम्युनिष्टहरू अधिनायकवादी व्यवस्थाको पक्षमा लागेका छन् ।

शाह काठमाडौं क्षेत्र नं. ५ का स्थायी बासिन्दा हुन् । नेपाली कांग्रेसको चुनावी प्रचारमा उनको उपस्थितिले कांग्रेस कार्यकर्तामा छुट्टै उत्साह थपिएको कांग्रेसका एक स्थानीय कार्यकर्ताले बताए । कांग्रेस नेता डा. प्रकाशशरण महत सो क्षेत्रबाट चुनावी प्रतिस्पर्धामा छन् ।

यसअघि सो क्षेत्रबाट नेपाली कांग्रेसले संविधानसभा निर्वाचनमा लगातार दुईपटकसम्म विजय हासिल गर्न सफल भएको थियो । अब तेस्रोपटक पनि कांग्रेसले नै जित्नेमा आफू आशावादी रहेको शाहको भनाइ थियो ।

नेपाली कांग्रेसका तर्फबाट सो क्षेत्रका उम्मेदवार डा. प्रकाशशरण महतले आफू सो क्षेत्रबाट निर्वाचित हुनेमा ढुक्क रहेको बताए । आफू कक्षा ६ मा पढ्दादेखि नै सोही क्षेत्रमा हुर्किएकाले त्यहाँको समस्यासँग आफू परिचित रहेको र त्यसको समाधानका बाटाहरू पनि पहिल्याइसकेको उनको दाबी थियो । आर्थिक समृद्धिको पहुँचमा जनतालाई पुर्याउनका लागि पनि कांग्रेस कटिबद्ध रहेको उनको जोड थियो ।

‘जनताको स्वतन्त्रता, मानवअधिकार र विधिको शासनमा पनि कांग्रेस विश्वास गर्छ,’ महतले भने, ‘अहिले कांग्रेसले उठाएका एजेन्डालाई सही किसिमले प्रस्तुत गर्ने, त्यही किसिमका कानुन निर्माण र व्यवस्थापन गर्ने क्षमता मैले राखेको छु ।’