काठमाडौँ। कोरोना महामारीपछि विश्वमा ओटीटी प्लेटफर्मको शक्तिशाली उदय भएको छ । हलिउड तथा बलिउडका ठुला स्टारका फिल्महरु हलमा भन्दा बढी ओटीटी रिलिजमा केन्द्रित हुन थालेका छन् भने ओटीटीबाट रेभेन्यु पनि फर्किरहेको छ ।
नेपालमा पनि ओटीटी प्लेटफर्म नभएका होइनन् तर, उतिसाह्रो फस्टाइसकेको छैन । नेपालको पहिलो ओटीटी हो, ‘सिनेमाघर एप’ । यो नेपालमा प्रमुख रुपमा रहेको ओटीटी प्लाटफर्म हो । यो एपलाई हामीले सबै प्रकारका मोबाईल, ट्याब्लोईड, एन्ड्रोइड टिभी, थियोअमेजन फायर टिभी सहित सबै प्रकारका स्मार्ट डिभाइसमा उपलब्ध छ भने क्रोमकास्ट प्रविधिको प्रयोग गरी विभिन्न डिभाइसहरुमा पनि हेर्न सकिने सुविधा रहेको छ । यसमा आफुलाई हेर्न मन लागेको एपमा उपलब्ध फिल्म, वेब सिरिज, स्ट्यान्ड अप कमेडी तथा सर्ट फिल्मलाई केहि रकम तिरेर हेर्न सकिन्छ ।
प्रायः निर्माताहरु क्षणिक लाभका लागि ९९ वर्षका लागि यूट्युब व्यवसायिक कम्पनीलाई फिल्मको सम्पूर्ण अधिकार सुम्पिँदै आएका छन् । दर्शकहरु पनि निःशुल्क फिल्म हेर्न पाईने भएपछि हलसम्म जान छाडेको अवस्था छ । यसले नेपाली फिल्म क्षेत्रमा भुसको आगो लगाएको छ । यूट्युबमा फिल्म आउने प्रतिक्षामा दर्शकहरु हल पुग्न छाड्नु सबैभन्दा चिन्ताको विषय हो ।
यूट्युबमा फिल्म रिलिज गर्दा हलको व्यवसाय समेत चौपट हुन थालेपछि केही निर्माताहरु भने ओटीटी प्लेटफर्मलाई विकल्पको रुपमा लिन थालेका छन् । निरन्तर आम्दानी भइरहने भएकाले पनि निर्माताहरुको यूट्युबभन्दा ओटीटीतर्फ आकर्षण बढ्न थालेको हो । निर्माता तथा निर्देशक अशोक शर्माले आफ्ना दुई फिल्म ‘जय भोले’ र ‘रातो टीका निधारमा’लाई यूट्युबमा रिलिज नगरी ओटीटीमा रिलिज गर्न लाग्नुले पनि ओटीटीप्रति निर्माताको आकर्षण बढेको बुझ्न सकिन्छ ।
वडा दशैंको अवसर पारेर आइतबार फूलपातीबाट यी दुबै फिल्म ‘सिनेमाघर एप’मा रिलिज भएका छन् । अब दर्शकहरुले यो दुई फिल्मलाई केही सीमित रकम तिरेर दशैंको रमझममा घरमै बसेर हेर्न पाउनेछन् । ‘जय भोले’ २०७५ सालको सफल फिल्म हो भने ‘रातो टीका निधारमा’ २०७६ सालमा प्रदर्शन भएको थियो । यी दुवै फिल्मका निर्माता तथा निर्देशक अशोक शर्मा हुन् ।
निर्देशक शर्माले आफ्ना यि दुई फिल्म यूट्युबमा कहिल्यै नआउने बताए । अन्य देशमा जस्तै नेपालमा पनि ओटीटी प्लेटफर्म फस्टाउनु पर्छ भन्ने उद्देश्यले आफूले ‘जय भोले’ र ‘रातो टीका निधारमा’लाई ‘सिनेमाघर एप’मा रिलिज गरेको उनको भनाई छ । यूट्युबमा फिल्म रिलिज गर्दा हलमा गएर फिल्म हेर्ने कल्चर पनि बिग्रने भएकाले आफूले ओटीटी रोजेको शर्मा बताउँछन् ।
उनि भन्छन्, ‘यूट्युब सुरक्षित पनि छैन । पाइरेसी पनि प्रशस्त मात्रामा हुन्छ । अनि अर्को कुरा हाम्रो रेभेन्युको हो । यूट्युबमा फिल्म दिँदा ९९ वर्षका लागि सम्पूर्ण अधिकार दिनुपर्छ । ९९ वर्षसम्म आफ्नो सम्पत्तिको आफूसँग अधिकार नै हुँदैन । अहिले प्रविधिको यति विकास भइरहेको छ कि विभिन्न अवसरहरु आउँछ । यूट्युबलाई फिल्म दिँदा ती अवसरहरु सबै गुम्छन् । साथै, नेपाली फिल्मको व्यापार हुने टेलिभिजन, अन्य अनलाइन प्लाटफर्महरु तथा अन्तराष्ट्रिय रुपमा हुने प्रदर्शनमा समेत यसले शत प्रतिशत घाटा दिएको छ । मैले अब बनाउने कुनै पनि फिल्म युट्यूबमा रिलिज गर्दिन ।’
ठुलो लगानिमा बनाएको फिल्म सित्तैमा देखाउनु हुँदैन भन्ने आफ्नो मान्यता रहेको शर्माको तर्क छ । ‘म अब कहिल्यै फिल्म यूट्युबमा हाल्दै हाल्दिनँ । हामीले फिल्म हलमा चलाउनका लागि बनाउँछौं । थिएटरमा फिल्म हेर्नु र यूट्युबमा फिल्म हेर्नुमा आकाश-जमिनको फरक छ । यूट्युबमा सित्तैमा फिल्म आउँदा थिएटरको व्यापारमा पनि ठूलो असर पुगेको छ । पैसा तिरेर फिल्म हेर्ने संस्कार बसाउन पनि मैले यूट्युबमा नभइ ओटीटीमा फिल्म रिलिज गरेको हुँ,’ उनले भने ।
अन्य देशमा ओटीटीको राम्रो विकास भइसकेकाले अब नेपालमा पनि त्यो जरुरी रहेको उनको कथन छ । अशोक शर्मा अगाडि भन्छन्, ‘हलमा जस्तै ओटीटीमा पनि फिल्म हेर्न पैसा तिर्नुपर्छ । यसले निर्मातालाई पनि राहत मिल्छ भने फिल्म हेर्ने संस्कार पनि जीवित रहन्छ ।’ हलमा जस्तै ‘जय भोले’ र ‘रातो टीका निधारमा’लाई ‘सिनेमाघर एप’मा पनि दर्शकको साथ मिल्नेमा उनि विश्वस्त छन् ।
‘जय भोले’मा स्वस्तिमा खड्का, सलोन बस्नेत, खगेन्द्र लामिछाने, सौगात मल्ल, वुद्दि तामाङ, राजाराम पौडेलको अभिनय छ भने ‘रातो टीका निधारमा’मा साम्राज्ञी राज्यलक्ष्मी शाह, अंकित शर्मा, बुद्दि तामाङ, रविन्द्र झा, शिवहरि पौडेल, नीता ढुंगाना, खुश्वु खड्का, राजाराम पौडेल लगायतका कलाकारको मुख्य भूमिका छ । यो फिल्मबाट अशोक शर्माका छोरा अंकितले अभिनेताको रुपमा डेब्यू गरेका हुन् ।
