प्रदेश सभा तथा प्रतिनिधि सभा निर्वाचनका लागि उम्मेदवारहरूको मनोनयन दर्ता अत्यन्तै शान्तिपूर्ण रूपमा सम्पन्न भएको छ । केही स्थानमा दर्ताको क्रम जारी रहेको भए पनि अधिकांश स्थानमा भने उम्मेदवारी दर्ताको काम सम्पन्न भइसकेको छ ।
यसअघिका निर्वाचनभन्दा यसपटकको निर्वाचन फरक देखिएको छ । नेपालमा कम्युनिष्ट अधिनायकवाद भित्र्याउने हेतुले नेपालका प्रमुख वाम पार्टीहरू एक भएर निर्वाचनमा गएका छन् भने नेपाली कांग्रेसले लगभग एक्लै ती दलको गठबन्धनसँग प्रतिस्पर्धा गर्नुपर्ने भएको छ । लोकतन्त्रवादी केही साना पार्टीहरूले कांग्रेसलाई केही स्थानमा साथ दिए पनि अधिकांश स्थानमा कांग्रेस एक्लैले माओवादी–एमाले गठबन्धनको सामना गर्दै छ ।
स्थानीय तह निर्वाचनको तेस्रो चरणपछि अत्तालिएर एमाले तथा माओवादी पार्टी ‘वाम गठबन्धन’ बनाउने दिशामा अघि बढे । दुई दलले सत्तास्वार्थ केन्द्रित गठबन्धन गरेको भन्दै ती पार्टीका कार्यकर्ताहरू सम्बन्धित पार्टी परित्याग गरी दिनानुदिन कांग्रेसमा प्रवेश गरेका छन् । ती पार्टीहरूबाट कांग्रेस प्रवेश गर्नेहरूको लहरले वाम एकताप्रति ती दलका कार्यकर्तामा देखिएको असन्तुष्टिलाई छर्लंग्याएको छ ।
एमाले र माओवादीले वामगठबन्धनको घोषणा गरेपछि नेपाली कांग्रेसले पनि गरेको लोकतान्त्रिक गठबन्धन निर्माणको गृहकार्य सुरु गर्यो । गठबन्धन बनाउने मात्र होइन, लोकतन्त्रमा विश्वास गर्ने जोसुकैलाई कांग्रेसले विनापूर्वाग्रह आफ्नो पार्टीमा स्वागत गरेसँगै नेपाली कांग्रेसमा प्रवेश गर्नेको लहरै चलेको छ ।
त्यो लहरमा राप्रपा, राजपा मात्र होइन, एमाले तथा माओवादीका कार्यकर्ता पनि ठूलो संख्यामा समाहित भइरहेका छन् । कोही व्यक्तिगत रूपमा प्रवेश गरेका छन् भने कोही ठूलो दलबलका साथ नेपाली कांग्रेसमा लागेका छन् । विभिन्न पार्टीमा महत्वपूर्ण जिम्मेवारी लिएर बसेका उनीहरूको निःशर्त कांग्रेस प्रवेशले देशव्यापी रूपमा लोकतन्त्रप्रतिको आस्थालाई पुष्टि गरेको छ ।
विजय गच्छदार नेतृत्वको मधेशी जनअधिकार फोरम लोकतान्त्रिक पार्टी, राष्ट्रिय अखण्ड पार्टी र राष्ट्रिय समता पार्टीलगायतका दलहरू नेपाली कांग्रेसमा समाहित भइसकेका छन् । राजपाका सहमहामन्त्री दिलीप धारेवाल दशँैलगत्तै नेपाली कांग्रेसमा प्रवेश गरे । तिहारपछि राजपाका महामन्त्री जंगीलाल राय नेपाली कांग्रेसमा प्रवेश गरे । उनीसँगै नागेन्द्रप्रसाद राय, गोपाल पंजियार, श्याम साह, रामप्रताप रायलगायतका नेताहरू कांग्रेसमा प्रवेश गरे । राप्रपाका सीताराम सिंह र सयौँ कार्यकर्ता पनि नेपाली कांग्रेसमा प्रवेश गरिसकेका छन् । राजपाकी महिला नेतृ सुभद्रा महतोलगायतका नेता–कार्यकर्ता पनि केही दिनअघि कांग्रेसमा प्रवेश गरेका छन् ।
वामपन्थी दलहरूले सत्तास्वार्थका कारण गठबन्धन बनाएपछि त्यसबाट असन्तुष्ट बनेका उनीहरूका लाखौँ कार्यकर्ताको कांग्रेस प्रवेशले नेपाली कांग्रेसलाई थप मजबुत बनाउँदै लगेको छ । पहिलो चरणमा मंसिर १० गते हुने निर्वाचनका लागि वामगठबन्धनका उम्मेदवारविरुद्ध धेरै स्थानमा वागी उम्मेदवारी परेको थियो । मंसिर २१ गते हुने दोस्रो चरणको निर्वाचनका लागि त्यो क्रम अझै बढेर गएको छ । वामगठबन्धनका उम्मेदवारविरुद्ध परेको वागी उम्मेदवारी हेर्दा नेपाली कांग्रेसले सोचेभन्दा राम्रो परिणाम प्राप्त गर्ने आँकलन गर्न थालिएको छ ।
वामगठबन्धनका हस्ती मानिएका माओवादी अध्यक्ष पुष्पकमल दाहाललाई चितवनबाट निर्वाचन जित्न मुस्किल देखिन्छ । स्थानीय निर्वाचनको परिणामलाई हेर्दा दाहाल उठेको क्षेत्रमा सबैभन्दा बलियो पार्टी नेपाली कांग्रेस नै देखिन्छ । कांग्रेसपछि राप्रपा र एमाले दोस्रो तथा तेस्रो स्थानमा छन् । दाहालको पार्टी माओवादीको सो क्षेत्रमा हैसियत ‘चौथो’ हो । कांग्रेसले राप्रपाका उम्मेदवार विक्रम पाण्डेलाई समर्थन गरेपछि सो स्थानमा पाण्डेको विजय सुनिश्चितजस्तै छ । आफूले १५ हजारभन्दा बढी मतले निर्वाचन जित्ने विक्रमको दाबी छ ।
एमाले अध्यक्ष केपी ओलीले पनि निर्वाचन जित्नेमा आशंका गरिएको छ । पहिला कांग्रेसका युवा नेता विश्वप्रकाश शर्मा ओलीको विरुद्धमा लड्ने चर्चा थियो । त्यसकारण सो क्षेत्र छाडेर अर्कै क्षेत्रमा गए । अब ओलीले कांग्रेस उम्मेदवार डा. खगेन्द्र अधिकारीको सामना गर्नुपर्नेछ । त्रिचन्द्रमा प्राध्यापन गर्दै आएका अधिकारी झापाका बुद्धिजीवीमाझ अत्यन्तै लोकप्रिय मानिन्छन् । त्यति मात्र होइन, पहिलो संविधानसभा चुनावमा एमाले अध्यक्ष ओलीलाई हराएका विश्वदीप लिङ्देनको कांग्रेस प्रवेशले पनि ओलीको पराजयमा भूमिका खेल्ने देखिन्छ । उक्त चुनावमा लिङ्देनले १६ हजार ९९ मत पाएका थिए । उनीसँग पराजित भएका ओलीले १४ हजार ९ सय ५९ मत ल्याएका थिए ।
वामगठबन्धनका अन्य नेताहरूलाई पनि निर्वाचन जित्न त्यति सजिलो पक्कै छैन । माओवादी तथा एमालेमा देखिएको टिकट विवाद, स्थानीय तह निर्वाचन र त्यसअघिदेखि नै दुई पार्टीका नेता तथा कार्यकर्ताबीच देखिएको शत्रुतापूर्ण सम्बन्धका कारण पनि उनीहरू एकले अर्काेलाई स्वीकार गर्न सक्ने स्थिति देखिँदैन ।
यावत् विषयहरूलाई मध्यनजर गर्दा योपटकको निर्वाचनमा नेपाली कांग्रेसले बाहिर भनिएभन्दा निकै बढी स्थानका साथ विजय हासिल गर्न गर्न सक्ने देखिन्छ । लोकतन्त्रमा आस्था राख्ने जुनसुकै दलका कार्यकर्ताले लोकतन्त्रको रक्षाका लागि कांग्रेस नै एक मात्र विश्वासिलो पार्टी मानेका कारण पनि देशभर कांग्रेसको पक्षमा माहोल बढ्ने निश्चितप्रायः छ ।
