‘कठपुतली’ हेरेका बुटवलका धिरज थापाले जिते ‘आइफोन १२’

‘कठपुतली’ हेरेका बुटवलका धिरज थापाले जिते ‘आइफोन १२’

काठमाडौं। गत बर्षको पुष १६ गते प्रदर्शनमा आएको व्यावसायिक सफल फिल्म ‘कठपुतली’ले दर्शकलाई हलसम्म आकर्षित गर्नका लागि उपहार योजना अगाडि सारेको थियो । फिल्म हेर्नका लागि सिनेमा हलको काउन्टरबाट काटेको टिकटसँग सेल्फी खिचेर सामाजिक सञ्जालमा पोस्ट गर्नेहरुमध्ये गोला प्रथाबाट एक जनालाई एप्पल कम्पनीको ‘आइफोन १२’ प्रदान गर्ने घोषणा गरिएको थियो ।

सोही घोषणा बमोजिम निर्माण टिमले ‘आइफोन १२’ जित्ने विजेताको नाम गोला प्रथाबाट छानेको छ । फिल्मको टिमले जारी गरेको सम्पूर्ण मापदण्ड पूरा गरेर टिकटसँग सेल्फी खिचेर सामाजिक सञ्जालमा पोस्ट गर्नेमध्ये धिरज थापाले १ लाख ३० हजार मुल्यको ‘आइफोन १२’ जितेका छन् । मंगलवार फिल्मका अभिनेता कार्म शाक्यले गोला प्रथाबाट विजेताको नाम घोषणा गरेका हुन् । सेल्फी पोष्ट भएको फेसबुक अकाउन्टबाट थापा बुटवलको भएका र उनले त्यहांको क्युएफएक्स हलमा फिल्म हेरेको बुझिएको छ ।

विजेता थापाले ७ जनवरीमा साथीहरु गएर बुटवलको हलमा ‘कठपुतली’ हेरेका थिए । उनले साथीहरुसहितको टिकटसँग सेल्फी खिचेर फेसबुकमा पोस्ट गरेका थिए । फिल्मकी कार्यकारी निर्मात्री तथा लेखक सम्पदा मल्लले विजेता थापासँग सम्पर्क गरेर उपहार हस्तान्तरण गर्ने बताइन् । उनले विजेता थापालाई उपहार ग्रहण गर्नका लागि आफूहरुसँग सम्पर्क गर्न पनि आग्रह गरेकी छन् ।

फिल्मको प्रिमियर र रिलिजमा नेपाल हुन नपाउँदा खल्लो महशुस भएको बताउँदै कार्मले फिल्मबाट मिलेको प्रतिक्रियाले उत्साहित भएको बताए । उनले भने, ‘म स्क्रिप्ट पढ्दा नै उत्साहित थिएँ । फिल्म हेरिसकेपछि झन् आशा जगायो । मलाई घिसिपिसी लभस्टोरी र फर्मुलाको फिल्म गर्नु छैन । म सधैं फरक फिल्म गर्न चाहन्छु । भोलीका दिनमा पनि ‘कठपुतली’ जस्तो फिल्म गर्ने मन छ ।’

पृथ्वी राना मगरद्वारा निर्मित तथा भिमसेन लामा निर्देशित फिल्ममा मिथिला शर्मा, गौरी मल्ल, कर्मा, उषा रजक, शिल्पा मास्के, सुवर्ण थापा, ध्रुव कोइराला लगायतको अभिनय रहेको छ । जोएल फ्रूमले खिचेका फिल्मका निर्माता पृथ्वी रानामगर हुन भने सह निर्माताहरुमा विशाल गुरुङ, धर्म श्रेष्ठ र हेम थापा छन् । हरर जनरामा बनेको फिल्मले दर्शकबाट उत्कृष्ट प्रतिक्रिया पाएको थियो ।