खोटाङ । खोटाङमा नेपाली कांग्रेस जिल्ला सभापतिका दुई आकांक्षीले सहकार्य गर्ने भएका छन् । जिल्ला अधिवेशनको पूर्वसन्ध्यामा पार्टी सभापति शेरबहादुर देउवा निकट पूर्वराज्यमन्त्री सर्वधन राई र नेता कृष्णप्रसाद सिटौला निकट महाधिवेशन प्रतिनिधि भूपेन्द्र राईबीचमा सहकार्य गर्ने सहमति भएको हो ।
हालसम्म दुबैले जिल्ला सभापतिमा दावी गर्दै आएका थिए । महाधिवेशन प्रतिनिधि भूपेन्द्रले पूर्वराज्यमन्त्री सर्वधनलाई सभापतिमा सहयोग गर्ने सहमति भएको स्राेत जनाएको छ । दुई पक्ष जिल्ला कार्य समितिका पदाधिकारी, सदस्य तथा संघीय महाधिवेशन प्रतिनिधि टुंग्याउन छलफलमा जुटेको छ । क्षेत्रीय कार्यसमिति (प्रदेश क र ख)को मत परीणामपछि सभापतिका दुई आकांक्षी एक ठाउँमा आइपुगेका हुन् ।
रामचन्द्र पौडेल निकट पूर्वसभापति विष्णुकुमार राई र देउवा निकट महासमिति सदस्य रवीप्रकाश राई पनि कांग्रेसको जिल्ला सभापतिको दौडमा छन् । महाधिवेशन प्रतिनिधि राईले पूर्वराज्यमन्त्री राईलाई समर्थन गर्ने भएपछि अब सभापतिका आकांक्षी तीन जना बाँकी छन् । पूर्वसभापति राईलाई वर्तमान सभापति नरेश श्रेष्ठ र शेखर कोइराला निकट महासमिति सदस्य सुवासकुमार पोखरेलको पनि समर्थन छ ।
निर्वाचन तालिका प्रकाशन
कांग्रेसको जिल्ला अधिवेशनका लागि जिल्ला निर्वाचन अधिकृतको कार्यालयले निर्वाचन तालिका प्रकाशन गरेको छ । सोमबार बिहान ८ बजेदेखि ८.३० बजेसम्म मतदाताको नामावलीमा दावी बिरोध, बिहान ९.३० बजेदेखि दिउँसो १ बजेसम्म मनोनयपत्र दर्ता, दिउँसो २ बजेसम्म उम्मेदवारको प्रथम नामावली प्रकाशन, दिउँसो २.३० बजेसम्म उम्मेदवारको नामावली उपर दावी बिरोध, दिउँसो ४ बजेसम्म उम्मेदवारको अन्तिम नामावली प्रकाशन गर्ने निर्वाचन तालिका प्रकाशन गरेको छ ।
मतदान मंगलबार बिहान ७ बजेदेखि दिउँसो १ बजेसम्म हुने निर्वाचन अधिकृतको कार्यालयले जनाएको छ ।
