काठमाडौं, २९ फागुन । नेकपा माओवादी केन्द्रको स्थायी कमिटी बैठकले गृहमन्त्री रामबहादुर थापासहित माओवादीका सांसदलाई २४ घण्टाभित्र सरकार छाड्न निर्देशन दिएको छ ।
पेरिसडाँडामा सम्पन्न स्थायी कमिटी बैठकले माओवादी केन्द्रका तर्फबाट सांसद रहेका मन्त्रीहरूलाई सरकार छाड्न निर्देशन दिएको प्रवक्ता नारायणकाजी श्रेष्ठले जानकारी दिए । नेकपा माओवादी केन्द्रले सरकारमा सहभागि मन्त्रीलाई फिर्ता बोलाएको छ ।माओवादी केन्द्रका तर्फबाट सरकारमा ७ जना मन्त्री छन् ।
सर्वोच्चको फैसलाले एमाले र माओवादी केन्द्रलाई ब्युँताइदिएपछि माओवादी केन्द्रका नेताहरू रामबहादुर थापा बादल, टोपबहादुर रायमाझी, लेखराज भट्ट, मणिचन्द्र थापा, प्रभु साह, गौरीशंकर थारू र दावा लामा मन्त्री छन् ।
उनीहरुलाई मन्त्री पदबाट राजिनामा गर्न स्थायी कमिटी बैठकले निर्देशन दिएको हो । नेकपामा रहँदा ओलीनिकट उनीहरुले पुरानै पार्टीमा नफर्किने घोषणा गरिसकेका छन् । एमालेमै रहने निर्णय गरेका माओवादी केन्द्रका मन्त्रीसहित २३ जनालाई एमाले अध्यक्ष केपी शर्मा ओलीले केन्द्रीय सदस्यमा मनोनित गर्नुका साथै विभिन्न जिम्मेवारी समेत दिइसकेका छन् ।
