–रामचन्द्र दुलाल–
काठमाडौं, ६ माघ । नेपाल पत्रकार महासंघको २६ औं महाधिवेशनको मिति तय भएसंगै चुनावी सरगर्मी बढेको छ ।
यसैबीच प्रजातान्त्रिक पत्रकारहरुको छाता संगठन नेपाल प्रेस युनियनका अध्यक्ष बद्री सिग्देलले नेपाल पत्रकार महासंघको आगामी नेतृत्व सबै संगठनहरुको सर्वसहमतीमा चयन गर्न युनियनले पहल शुरु गरेको बताउनुभएको छ ।
आज पत्रकारहरुबीच युनियनले आयोजना गरेको छलफल कार्यक्रममा अध्यक्ष सिग्देलले युनियनको नेतृत्वमा सर्वसहमतीले महासंघको नेतृत्व चयनकालागि सबै संगठनहरुलाई आहवान गर्नुभएको हो ।
‘अहिलेको विषम परिस्थितिमा पत्रकारका संगठनहरु फुटेर होइन जुटेर अघि बढ्नुपर्ने आवश्यकता रहेकोले पत्रकारहरुको छाता संस्था पत्रकार महासंघका जिल्ला, प्रतिष्ठान, प्रदेश र केन्द्रमा सर्वसहमतीले नेतृत्व चयन गर्न सबै संगठनहरुसंग छलफल प्रारम्भ गरेका छौं’ – सिग्देलले भन्नुभयो ।
अहिलेको राजनीतिक जटिलताका बीच पत्रकार महासंघको भावी नेतृत्व अझै बढी साझा चरित्रको हुनुपर्ने कुरामा जोड दिदै सिग्देलले लोकतन्त्रको रक्षा र प्रेस तथा अभिव्यक्ति स्वतन्त्रतालाई मुल एजेण्डा बनाएर अझै पनि लड्नुपर्ने अवस्था भएकोले लोकतन्त्र, पूर्ण प्रेस स्वतन्त्रता र नागरिक अधिकारकालागि सबै विचारका पत्रकारहरु एकजुट भएर महासंघकाे नेतृत्व चयन गर्नुपर्ने बताउनुभयो ।
गत माघ ३ र ४ गते सिन्धुपाल्चोकको हेलम्बुमा बसेको महासंघको १२ औं पूर्ण बैठकले आगामी फागुन ४ र ५ गते केन्द्रीय महाधिवेशन गर्ने निर्णय गरेको हो । महासंघले आउँदो माघ २० गतेसम्म सबै शाखाहरुको साधारणसभा र माघ ३० सम्म प्रदेशको साधारण सभा सम्पन्न गरिसक्ने निर्णय पनि गरेको महासंघका सचिव प्रकाश थापाले जानकारी दिनुभयो ।
महासंघले निर्वाचन प्रक्रिया सम्पन्न गर्न १ जना वरिष्ठ पत्रकारको संयोजकत्वमा ४ जना अधिवक्ता र समावेशी क्षेत्रका पत्रकारको समेत प्रतिनिधित्व हुने गरी ७ सदस्यीय केन्द्रीय निर्वाचन समिति गठन गर्ने जिम्मा केन्द्रीय कार्यालयलाई दिएको छ ।
सचिव थापाकाअनुसार महासंघले अनुमोदन भएका नयाँ सदस्यको विवरण माघ १५ गतेसम्म केन्द्रीय कार्यालयमा पठाउन प्रदेश समितिलाई आग्रह गरेको छ । अहिले महासंघका जिल्ला र प्रतिष्ठान शाखाहरुको अधिवेशन धमाधम भइरहेको छ । पहिलो पटक प्रत्यक्ष निर्वाचनबाट नयाँ नेतृत्व चयन हुने महासंघको निर्वाचन भने महाधिवेशन सम्पन्न भएको एक महिना पछि मात्र हुने छ ।
