युवतीको मृत्यु भएपछि कैलालीको लम्की तनावग्रस्त,सात प्रहरी घाइते

युवतीको मृत्यु भएपछि कैलालीको लम्की तनावग्रस्त,सात प्रहरी घाइते

कैलाली, १७ वैशाख  ।पूर्व–पश्चिम राजमार्गअन्तर्गत कैलालीको लम्कीमा ट्रकको ठक्करबाट स्थानीय एक युवतीको मृत्यु भएपछि प्रदर्शन गरिएको छ।

।ना ७ ख ९२३३ नं.को ट्रकको ठक्करबाट लम्की बहुमुखी क्याम्पसमा अध्ययनरत १९ वर्षीया सुनिता रावलको मृत्यु भएको थियो। आक्रोशित स्थानीय बासिन्दाले गरेको प्रदर्शनले उग्ररुप लिएपछि स्थिति नियन्त्रणमा लिन प्रहरीले लाठी प्रहार गर्नुका साथै अश्रुग्यासको प्रयोग गर्नुपरेको छ।स्थानीय बासिन्दाको प्रदर्शनले लम्की क्षेत्र तनावग्रस्त बनेको छ

प्रदर्शनकारीका तर्फबाट प्रहार भएको ढुङ्गा लागेर सात जना प्रहरी घाइते भएको जिल्ला प्रहरी कार्यालयका प्रवक्ता दक्षकुमार बस्नेतले बताए। प्रहरी जवान रामबहादुर बुढा, सुरत रावल, रामबहादुर बुढा, सहायक प्रहरी हवल्दार प्रेमसिंह धामी, बमबहादुर सुनार, फलाराम चौधरी, सन्दीप चौधरी घाइते भएका छन्।

झडपमा लम्की बहुमुखी क्याम्पसका प्रेमराज मुडभरी घाइते भएका छन्। घाइते सबैको अवस्था खतारमुक्त रहेको प्रहरीले जनाएको छ। उनीहरूको स्थानीय लालरत्न अस्पतालमा घाइतेको उपचार भइरहेको छ।

मृतकलाई उचित क्षतिपूर्ति र चालकलाई कारवाही गर्न माग गर्दै स्थानीयवासीले पूर्व–पश्चिम राजमार्गको लम्की खण्ड अवरुद्ध गरेर प्रदर्शन जारी राखेका छन् । प्रहरीले ट्रकका चालकलाई नियन्त्रणमा लिएको छ।