काठमाडौँ: प्रधानमन्त्री केपी शर्मा ओली आज स्वीट्जरल्याण्ड भ्रमणमा जाँदैछन्। विश्व आर्थिक मञ्चको ४९ औँ वार्षिक बैठकमा सहभागी हुनका लागि प्रधानमन्त्री आज साँझ त्यसतर्फ प्रस्थान गर्ने कार्यक्रम रहेको छ। पहिलोपटक सहभागी हुन लागेको नेपालले मञ्चलाई देशको इज्जत र प्रतिष्ठा बढाउने विषयमा उपयोग गर्ने प्रधानमन्त्री ओलीले बताउनुभयो । परराष्ट्र मन्त्रालयले सार्वजनिक गरेको भ्रमण तालिका अनुसार, सम्मेलनका क्रममा प्रधानमन्त्री ओलीले २२ जनबरीमा स्ट्राटेजिक आउटलुक अन साउथ एसियामा आफ्नो धारणा राख्नुहुनेछ । यस्तै, २३ जनबरीमा प्रधानमन्त्री ओलीले सेपिङ दि फ्युचर अफ डेमोक्रेसीका विषयमा धारणा राख्नुहुनेछ । सत्रमा कोलम्वियाका राष्ट्रपति तथा अर्मेनियाका प्रधानमन्त्री पनि सहभागी हुनुहुनेछ । सो सत्रमा फाइनान्सियल टाइम्स र न्युयोर्क टाइम्सका सम्पादक पनि सहभागी हुने प्रधानमन्त्री ओलीले जानकारी दिनुभयो । प्रधानमन्त्री ओलीसँग भ्रमण दलमा उनकी पत्नी राधिका शाक्य, परराष्ट्र मन्त्री प्रदीप ज्ञवाली, अर्थमन्त्री युवराज खतिवडासहित प्रधानमन्त्री कार्यालय, परराष्ट्र र अर्थ मन्त्रालयका उच्च अधिकारीसमेत सहभागी हुनेछन्। जनवरी २४ मा उहाँले जी–२० का देशका प्रमुखहरुसँग छलफल गर्ने कार्यक्रम छ । सो सत्रको साइडलाइनमा देशका नेता तथा विजनेस लिडरहरुसँग पनि छलफल हुने प्रधानमन्त्री ओलीले बताउनुभयो । उहाँ यही माघ १२ गते फर्कने कार्यक्रम छ ।
