काठमाडौं, २० पुस– सरकारले खाना बनाउने ग्यास उद्योग (बोटलिङ प्लाण्ट) माथि कडाई गर्ने भएको छ । पछिल्लो समय ग्यास सिलिण्डर विस्फोटनका घटना बढ्नुमा उद्योगको लापरवाही नै प्रमुख कारण भएको भन्दै सरकारले बोटलिङ प्लान्टमाथि कडाई गरेको हो ।
गुणस्तर तथा नापतौल विभागले तत्काल उद्योगमाथि अनुगमन सुरु गरी माददण्डभन्दा बाहिर रहेकालाई कारबाही गर्ने चेतावनी दिएको छ । विभागले गुणस्तर मापदण्ड (एनएस) चिह्न नलिने ग्यास उद्योगलाई बन्दसम्म गर्ने चेतावनी दिएको छ ।
विभागका महानिर्देशक विश्वबाबु पुडाशैनीकाअनुसार गुणस्तर मापदण्ड (एनएस) चिह्न एनएस नलिएका उद्योग सञ्चालन गर्न नदिन नेपाल आयल निगमलाई पत्राचारसमेत गरिसकिएको छ ।
उद्योगीहरुले पटक पटक भन्दा पनि गुणस्तर मापदण्ड चिन्ह एनएस लिन ढिलाई गरेपछि कडा रुपमा प्रस्तुत हुनु परेको विभागको भनाइ छ ।
विभागका महानिर्देशक पुडाशैनीका अनुसार विभागले गत वर्ष कात्तिकमा तीन महिनाभित्र अनिवार्य रुपमा एनएस चिन्ह लिन बोटलिङ प्लान्टलाई आग्रह गरेको थियो । तर, एक वर्ष वितिसक्दा पनि आग्रह पालना नगरेपछि कडाई गर्नुपरेको पुडाशैनीले बताए ।
अहिले ४ वटा यस्ता बोटलिङ प्लान्टले मात्र एनएस चिह्न लिएको विभागले जनाएको छ । जसमध्ये गुणस्तर चिह्न लिने उद्योगमा मनोज ग्यास प्रालि, श्रीकृष्ण ग्यास, नेपाल ग्यास उद्योग प्रालि र साइबाबा ग्यास उद्योग प्रालि छन् ।
हाल नेपालमा ५५ वटा ग्यास उद्योग सञ्चालनमा रहेको उद्योग विभागले जनाएको छ ।
गुणस्तर मापदण्ड पालना नगर्ने उद्योगमाथि ६ महिना कैद वा तीन हजार रुपैयाँ जरीवाना तिराउन सकिने कानूनी व्यवस्था रहेको पुडाशैनीले बताए । लोकान्तरबाट
