दैनिकजसो ट्राफिक जामको समस्या भोग्नुपर्ने नयाँ बानेश्वर, कोटेश्वर, माइतीघर, चाबहिल, रत्नपार्क र कलंकीलगायतका व्यस्त चोकहरूमा अहिले सवारी आवागमन निकै कम भएको छ। सडकमा फाट्टफुट्ट निजी तथा सार्वजनिक सवारीसाधन मात्रै गुडिरहेका छन्।
दसैँको सार्वजनिक बिदाका कारण सरकारी तथा गैरसरकारी कार्यालयसँगै अधिकांश पसल र व्यवसायसमेत बन्द छन्। बजार क्षेत्रमा चहलपहल घटेको छ भने सडकमा सवारीसाधनको चाप कम हुँदा ट्राफिक व्यवस्थापन पनि सहज बनेको छ।
दसैँ मनाउन ठूलो संख्यामा सर्वसाधारण उपत्यकाबाहिर गएपछि रित्ता घर तथा आवासीय बस्तीमा चोरी, लुटपाटलगायतका आपराधिक घटना हुन सक्ने जोखिमलाई ध्यानमा राख्दै प्रहरीले सुरक्षा सतर्कता बढाएको छ।
काठमाडौं उपत्यका प्रहरी कार्यालयले विभिन्न संवेदनशील क्षेत्र तथा आवासीय बस्तीमा विशेष सुरक्षा योजना लागू गरेको छ। सम्भावित आपराधिक गतिविधि नियन्त्रण गर्न चौबीसै घण्टा गस्ती र निगरानी बढाइएको छ।
दसैँको मुख्य दिन विजयादशमीमा टीका लगाउने र त्यसपछि आफन्त तथा परिवारजनसँग भेटघाट गर्ने क्रम चल्ने भएकाले आगामी केही दिनसम्म उपत्यकामा चहलपहल न्यून रहने अनुमान गरिएको छ।
कोजाग्रत पूर्णिमापछि भने दसैँ मनाउन गाउँघर पुगेका सर्वसाधारण पुनः काठमाडौं फर्किन थाल्नेछन्। त्यससँगै उपत्यकाका सडक, बजार तथा सार्वजनिक स्थलमा चहलपहल बढ्ने अपेक्षा गरिएको छ।
दसैँका बेला उपत्यकाका व्यस्त सडकहरू सुनसान देखिनु राजधानीको नियमित जीवनशैलीमा आएको मौसमी परिवर्तनको एउटा परिचित दृश्य बनेको छ।
