काठमाडौं । मोरक्कोबाट स्पेनको स्वायत्त क्षेत्र सेउटामा ठूलो संख्यामा प्रवेश गरेका आप्रवासीलाई फिर्ता पठाउने अभियानमा स्पेनले उल्लेखनीय सफलता हासिल गरेको जनाएको छ। स्पेनी सञ्चारमाध्यमका अनुसार गत सातादेखि सुरु भएको अभियानअन्तर्गत अधिकांश आप्रवासीलाई मोरक्को फर्काइएको छ।
स्पेनको अनुमानअनुसार हालसम्म करिब ६९ हजार ५०० आप्रवासीलाई मोरक्को पठाइसकिएको छ, जुन प्रारम्भिक ५० हजारको अनुमानभन्दा बढी हो। घटनाका क्रममा स्पेनतर्फ ७२ र मोरक्कोतर्फ ११ जनाको मृत्यु भएको पनि जनाइएको छ।
सेउटामा हजारौं आप्रवासीको अनियन्त्रित प्रवेशपछि युरोपेली आयोगकी अध्यक्ष उर्सुला भोन डेर लेयनले युरोपेली संघका सदस्य राष्ट्रलाई सीमा सुरक्षामा एकताबद्ध भएर काम गर्न आह्वान गरेकी छन्। यस विषयमा छलफल गर्न युरोपेली संघका आन्तरिक मामिला मन्त्रीहरूले भिडियो कन्फरेन्समार्फत आपतकालीन बैठक गर्ने भएका छन्।
यस घटनाले युरोपेली संघभित्र पनि मतभेद देखिएको छ। भोन डेर लेयनले स्पेनका प्रधानमन्त्री पेड्रो सान्चेजको संकट व्यवस्थापनको प्रशंसा गर्दै भविष्यमा संवेदनशील सीमा क्षेत्रमा सुरक्षा अझ मजबुत बनाउनुपर्ने बताएकी छन्।
यद्यपि, आप्रवासी संकटपछि इटालीले स्पेनसँगको सेन्जेन व्यवस्थालाई अस्थायी रूपमा स्थगित गरेको छ। फिनल्यान्ड र डेनमार्कले इटालीको कदमलाई समर्थन गरेका छन् भने चेक प्रधानमन्त्री आन्द्रे बाबिसले स्पेनको सेन्जेन सदस्यता अस्थायी रूपमा निलम्बन गर्नुपर्ने धारणा राखेका छन्।
यसप्रति प्रतिक्रिया दिँदै प्रधानमन्त्री सान्चेजले केही युरोपेली सरकारहरूले पूर्वाग्रह, गलत सूचना वा राजनीतिक स्वार्थका आधारमा स्पेनको आलोचना गरेको आरोप लगाएका छन्। उनले सेउटा सेन्जेन क्षेत्रको हिस्सा नभएको दाबी पनि गरेका छन्।
स्पेनी सञ्चारमाध्यमका अनुसार सर्वोच्च अदालतले स्पेन प्रवेश गरिसकेका मोरक्कोका आप्रवासीलाई देश निकाला गर्न नहुने आदेश दिएपछि मोरक्कोबाट सेउटातर्फ आप्रवासीको चाप एकाएक बढेको थियो।
