काठमाडौं । फ्रान्सका कप्तान किलियन एमबाप्पे फिफा विश्वकप–२०२६ मा सर्वाधिक गोल गर्ने खेलाडी बनेका छन्। तेस्रो स्थानका लागि इंग्ल्यान्डविरुद्ध शनिबार बिहान भएको खेलमा दुई गोल गरेसँगै उनले प्रतियोगितामा आफ्नो गोल संख्या १० पुर्याएका हुन्।
यद्यपि, उक्त खेलमा फ्रान्स ६-४ को नतिजाले इंग्ल्यान्डसँग पराजित भयो र इंग्ल्यान्डले तेस्रो स्थान हासिल गर्यो। एमबाप्पेको दुई गोलसँगै उनले विश्वकप इतिहासमा आफ्नो कुल गोल संख्या २२ पुर्याउँदै नयाँ कीर्तिमान कायम गरेका छन्। तीन संस्करणको विश्वकपमा २२ गोल गरेका उनले यसअघि २१ गोल गरेका अर्जेन्टिनाका कप्तान लियोनल मेसीलाई पनि उछिनेका छन्।
जारी विश्वकपमा एमबाप्पेले १० गोल गरिसकेका छन् भने मेसीको नाममा हाल ८ गोल छ। अर्जेन्टिनाले स्पेनविरुद्ध खेल्ने फाइनलमा मेसीसँग आफ्नो गोल संख्या थप्ने अवसर भने बाँकी छ।
एमबाप्पेले यस प्रदर्शनसँगै प्रतियोगिताको सर्वाधिक गोलकर्तालाई प्रदान गरिने ‘गोल्डेन बुट’ अवार्डको दौडमा पनि अग्रता लिएका छन्। विश्वकपमा सबैभन्दा धेरै गोल गर्ने खेलाडीले ‘गोल्डेन बुट’ जित्ने परम्परा छ। सन् २०२२ को विश्वकपमा पनि एमबाप्पेले यही अवार्ड जितेका थिए। यसपटक पनि उनी लगातार दोस्रो पटक ‘गोल्डेन बुट’ जित्ने सबैभन्दा बलिया दाबेदारका रूपमा उभिएका छन्।
