काठमाडौं । फिफा विश्वकप–२०२६ अन्तर्गत समूह ‘ए’ को अन्तिम खेलमा सहआयोजक मेक्सिकोले चेक गणतन्त्रलाई ३-० ले पराजित गर्दै शतप्रतिशत नतिजासहित समूह विजेता बनेको छ। मेक्सिको सिटी स्टेडियममा सम्पन्न खेलको पहिलो हाफ गोलरहित बराबरीमा सकिए पनि दोस्रो हाफमा मेक्सिकोले उत्कृष्ट प्रदर्शन गर्दै तीन गोल गरेको थियो।
मेक्सिकोका लागि ५५औँ मिनेटमा मातेओ चाभेजले गोल गर्दै टोलीलाई अग्रता दिलाए। त्यसपछि ६१औँ मिनेटमा किन्योनेसले दोस्रो गोल थपे। खेलको इन्जुरी समयमा अल्भारो फिडाल्गोले अर्को गोल गर्दै मेक्सिकोको ३-० को जित सुनिश्चित गरे।
यसअघि नै लगातार दुई खेल जित्दै नकआउट चरणमा स्थान सुरक्षित गरिसकेको मेक्सिकोले समूह चरणका तीनवटै खेल जितेर ९ अंक बटुलेको छ। उक्त प्रदर्शनसँगै मेक्सिको समूह ‘ए’ को शीर्ष टोलीका रूपमा अन्तिम ३२ मा प्रवेश गरेको छ। यता, चेक गणतन्त्र भने समूह चरण पार गर्न असफल भएको छ। मेक्सिकोले प्रतियोगितामा उपाधि दाबेदार टोलीका रूपमा आफ्नो प्रभावशाली प्रदर्शनलाई निरन्तरता दिएको छ।
