काठमाडौं । फिफा विश्वकप–२०२६ अन्तर्गत बुधबार बिहान बोस्टन स्टेडियममा सम्पन्न खेलमा नर्वेले इराकलाई ४–१ गोलअन्तरले पराजित गर्दै प्रतियोगितामा विजयी सुरुआत गरेको छ। नर्वेको जितमा स्टार फरवार्ड Erling Haaland ले दुई गोल गरे। २८ वर्षपछि विश्वकपमा फर्किएको नर्वेले प्रभावशाली प्रदर्शन गर्दै महत्वपूर्ण तीन अंक बटुल्न सफल भयो। ४० वर्षपछि विश्वकपमा पुनरागमन गरेको इराक भने पहिलो खेलमै पराजित बन्न पुग्यो।
खेलको २९औँ मिनेटमा एन्टोनियो नुसाको उत्कृष्ट पासमा हालान्डले गोल गर्दै नर्वेलाई अग्रता दिलाए। त्यसको १० मिनेटपछि इराकका स्ट्राइकर Aymen Hussein ले आकर्षक हेडरमार्फत गोल गर्दै खेललाई १–१ को बराबरीमा ल्याएका थिए।
तर पहिलो हाफ सकिनुअघि ४३औँ मिनेटमा इराकी रक्षापंक्तिको कमजोरीको फाइदा उठाउँदै हालान्डले व्यक्तिगत दोस्रो गोल गरे र नर्वेलाई पुनः अग्रता दिलाए।
दोस्रो हाफमा नर्वेले थप दुई गोल गर्यो। ७६औँ मिनेटमा वैकल्पिक खेलाडी लियो ओस्टिगार्डले हेडरमार्फत गोल गर्दै अग्रता ३–१ पुर्याए। खेलको अन्त्यतिर आयमेन हुसेनबाट भएको आत्मघाती गोलपछि नर्वेले ४–१ को सहज जित सुनिश्चित गर्यो। यस जितसँगै नर्वेले समूह चरणमा तीन अंक जोडेको छ। नर्वेले अब जुन २६ मा सेनेगलसँग प्रतिस्पर्धा गर्नेछ भने इराकले आफ्नो दोस्रो खेलमा बलियो टोली France को सामना गर्नेछ।
