काठमाडौं । सन् २०१० मा अफ्रिकी भूमिमा आयोजित विश्वकपको उद्घाटन खेलमा आयोजक दक्षिण अफ्रिका र मेक्सिकोले १–१ को बराबरी खेलेका थिए। ठीक १६ वर्षपछि यी दुई टोली फेरि विश्वकपकै उद्घाटन खेलमा एकअर्काविरुद्ध मैदान उत्रँदै छन्।
फिफा विश्वकप २०२६ को उद्घाटन खेलमा सह–आयोजक मेक्सिकोले दक्षिण अफ्रिकाको सामना गर्दै प्रतियोगिताको औपचारिक सुरुआत गर्नेछ। खेल मेक्सिको सिटीस्थित ऐतिहासिक Estadio Azteca मा हुनेछ, जहाँ करिब ८० हजारभन्दा बढी दर्शक उपस्थित हुने अपेक्षा गरिएको छ।
फिफा विश्वकप २०२६ मा पहिलो पटक ४८ टोली सहभागी हुँदैछन्। प्रतियोगिता ३९ दिनसम्म चल्नेछ र कुल १०४ खेल खेलाइनेछन्, जुन विश्वकप इतिहासकै सबैभन्दा ठूलो संस्करण हुनेछ। यसपटक विश्वकप संयुक्त रूपमा तीन देश— United States, Mexico र Canada ले आयोजना गरिरहेका छन्।
खेल सुरु हुनुभन्दा ९० मिनेटअघि उद्घाटन समारोह आयोजना हुनेछ। समारोहमा J Balvin, Tyla लगायतका अन्तर्राष्ट्रिय कलाकारको प्रस्तुति रहनेछ।
‘एल ट्राइ’ उपनामले परिचित मेक्सिकोले विश्वकपमा आफ्नो १७औँ सहभागिता जनाउँदैछ। मेक्सिको सिटीको यो रंगशालाले सन् १९७०, १९८६ र २०२६ गरी तीन विश्वकप उद्घाटन खेल आयोजना गर्ने विश्वकै पहिलो रंगशाला बन्ने कीर्तिमान पनि बनाउँदैछ।
घरेलु मैदान, समर्थकको साथ र पछिल्ला उत्कृष्ट प्रदर्शनका कारण मेक्सिकोलाई बलियो दाबेदार मानिएको छ। तर हजारौँ समर्थकको अपेक्षाले टोलीमाथि जितसहित प्रतियोगिता सुरु गर्ने दबाब पनि उत्तिकै छ।
दक्षिण अफ्रिकाका प्रशिक्षक Hugo Broos ले भने टोलीले मेक्सिकोको चुनौती सामना गर्न पर्याप्त तयारी गरेको बताएका छन्। उनले सन् २०१० को उद्घाटन खेलको स्मरण गर्दै यसपटक पनि प्रतिस्पर्धात्मक खेल हुने विश्वास व्यक्त गरेका छन्।
विश्व फुटबलको सबैभन्दा ठूलो महोत्सवको सुरुआतसँगै विश्वभरका समर्थकको ध्यान अब मेक्सिको र दक्षिण अफ्रिकाबीचको उद्घाटन खेलमा केन्द्रित भएको छ।
