काठमाडौं । पूर्वप्रधानमन्त्री सुशीला कार्कीले सरकारले विपक्षी शक्तिलाई समाप्त पार्ने सोच राख्न नहुने बताएकी छन्। लोकतन्त्रमा सत्ता र प्रतिपक्षबीच स्वस्थ प्रतिस्पर्धा आवश्यक हुने भन्दै उनले राजनीतिक दलहरूबीचको आलोचना र प्रतिआलोचनालाई लोकतान्त्रिक अभ्यासका रूपमा लिनुपर्ने धारणा व्यक्त गरिन्।
शुक्रबार काठमाडौंमा आयोजित एक कार्यक्रममा बोल्दै कार्कीले सत्तापक्षले आफू शक्तिमा पुगेको आधारमा विपक्षलाई ध्वस्त पार्ने प्रयास गर्नु लोकतान्त्रिक मूल्य–मान्यताविपरीत हुने बताइन्।
उनले भनिन्, “राजनीतिक दलहरूबीच प्रतिस्पर्धा र मतभेद स्वाभाविक हो। प्रतिपक्षले सरकारका कमजोरी औँल्याउँछ, तर त्यसलाई शत्रुताको रूपमा नभई सुधारका लागि मार्गनिर्देशनका रूपमा लिनुपर्छ।”
कार्कीले प्रधानमन्त्री वालेन्द्र शाह र सत्तारुढ **राष्ट्रिय स्वतन्त्र पार्टी (रास्वपा)**का नेताहरूलाई इतिहासबाट सिकेर अघि बढ्न सुझाव दिइन्। शासन सञ्चालनमा अनुभव, इतिहास र विगतका अभ्यासबाट पाठ सिक्नु आवश्यक रहेको उनको भनाइ थियो।
“अघिल्ला अनुभव र इतिहासलाई मनन गरेर मुलुक चलाउनुपर्छ। आजका युवा नेताहरू पनि भविष्यमा अनुभवसहितको नेतृत्वमा पुग्नेछन्,” उनले भनिन्।
सत्तारुढ दलका नेताहरूलाई लक्षित गर्दै उनले सत्ता स्थायी नहुने स्मरण गराइन्। आफू सत्तामा पुगेको भरमा अर्को पक्षलाई समाप्त पार्ने मानसिकता लोकतन्त्रका लागि घातक हुने उनको टिप्पणी थियो।
कार्कीले विपक्षी दलहरूलाई पनि सरकारको निरन्तर अवरोध र ‘खुट्टा तान्ने’ प्रवृत्तिबाट टाढा रहन आग्रह गरिन्। उनका अनुसार लोकतन्त्रमा सरकार र प्रतिपक्षबीचको स्वस्थ प्रतिस्पर्धाले नै शासन प्रणालीलाई प्रभावकारी र उत्तरदायी बनाउँछ।
उनले राजनीतिक दलहरूलाई लोकतान्त्रिक व्यवस्थाको आधारस्तम्भका रूपमा चित्रित गर्दै दलहरूबीचको प्रतिस्पर्धाले मुलुकलाई सही दिशामा अघि बढाउन मद्दत गर्ने बताइन्। “एक–अर्काप्रति रचनात्मक आलोचना र प्रतिस्पर्धाको भावना रहँदा लोकतन्त्र थप सुदृढ हुन्छ,” उनले भनिन्।
