काठमाडौँ । अघिल्लो कारोबार दिन ३० अंकले बढेको शेयर बजार बिहीबार भने ओरालो लागेको छ। नेपाल स्टक एक्सचेञ्ज (नेप्से) परिसूचक १२.३६ अंकले घट्दै २७४२ अंकमा कायम भएको हो।
बजार घटे पनि कारोबार रकममा भने सामान्य वृद्धि भएको छ। अघिल्लो दिन ३ अर्ब ८२ करोड रुपैयाँ बराबरको कारोबार भएकोमा बिहीबार ३ अर्ब ८९ करोड रुपैयाँको कारोबार भएको छ। कारोबार अवधिभर बजार अधिकांश समय रातो अंकमै देखिएको थियो।
आज ७२ कम्पनीको शेयर मूल्य बढ्दा १८८ कम्पनीको मूल्य घटेको छ भने ९ कम्पनीको मूल्य स्थिर रहेको छ।
लगभग सबै समूहका सूचक घटेका छन्, यद्यपि कुनै पनि समूहको गिरावट १ प्रतिशतभन्दा बढी रहेन। बैंकिङ समूह ०.५७ प्रतिशत, विकास बैंक ०.३१, फाइनान्स ०.२१, होटल तथा पर्यटन ०.८६, जलविद्युत् ०.६८, लगानी ०.३३, जीवन बीमा ०.१०, उत्पादन तथा प्रशोधन ०.३६, माइक्रोफाइनान्स ०.५०, निर्जीवन बीमा ०.४२ तथा अन्य समूह ०.३१ प्रतिशतले घटेका छन्। व्यापार समूह भने स्थिर रहेको छ।
आज बुंगल हाइड्रोपावर को शेयर मूल्य सबैभन्दा धेरै ६.१८ प्रतिशतले बढेको छ। मूल्य वृद्धि हुने कम्पनीहरूको सूचीमा बैंक तथा वित्तीय संस्थाका डिबेन्चरहरू पनि अगाडि रहेका छन्।
यता अपर लोहोरेखोला जलविद्युत् आयोजना को शेयर मूल्य सबैभन्दा धेरै १४.९५ प्रतिशतले घटेको छ। त्यसैगरी झापा इनर्जी को ८.१२ प्रतिशत, माउन्टेन हाइड्रो नेपाल को ७.४० प्रतिशत तथा सिटी होटल को शेयर मूल्य ३.८० प्रतिशतले घटेको छ।
आज सबैभन्दा बढी कारोबार भएका कम्पनीहरूमा आँखुखोला जलविद्युत् कम्पनी, रिडी पावर कम्पनी, बुंगल हाइड्रोपावर, एनआरएन इन्फ्रास्ट्रक्चर र फर्स्ट माइक्रोफाइनान्स रहेका छन्।
