काठमाडौं, १० कार्तिक । सत्तारुढ नेपाल कम्युनिस्ट पार्टी नेकपाले दशै तिहार र छठको अवसरमा आज चियापान कार्यक्रम गरेको छ । राजधानीको भृकुटीमण्डपमा भएको शुभकामना आदान प्रदान तथा चियापान कार्यक्रममा नेता कार्यकर्ताको बाक्लो उपस्थिति रहेको थियो ।
चियापान समारोहमा उपस्थित नेता कार्यकर्ता तथा पाहुनाहरुलाई स्वागत गर्दै अध्यक्ष पुष्पकमल दाहालले मुलुक नयाँ राजनीतिक कालखण्डमा प्रवेश गरेको बताउनुभयो । उहाँले समृद्धि र समाजवादको नयाँ युगको तयारी गर्ने सन्र्दभमा सांस्कृतिक कार्यक्रमहरुको पनि विशेष महत्व रहेको बताउनुभयो । चियापान समारोहमा पार्टी अध्यक्ष पुष्प कमल दाहाल प्रचण्ड, नेताहरु माधव कुमार नेपाल, वामदेव गौतम, सुवास नेम्वाङ्ग, रामबहादुर थापा वादल सहित सबै नेता कार्यकर्ताको उपस्थिति थियो । यसैबीच, नेकपाले गरेको चियापान कार्यक्रममा पार्टी अध्यक्ष एवं प्रधानमन्त्री केपी शर्मा ओली भने सहभागि हुनुभएन । उहाँ अस्वस्थ हुनुभएकाले कार्यक्रममा उपस्थिति हुन नसक्नुभएको उहाँको सचिवालयले जनाएको छ । यसैबीच नेपाली कांग्रेसका सभापति शेरबहादुर देउवा सत्तारुढ दल नेपाल कम्युनिष्ट पार्टी (नेकपा) को चियापान समारोहमा पुग्नु भएको थियो ।
सभापति देउवा काठमाडौँको भृकुटीमण्डपमा आयोजना गरिएको चियापान समारोहमा करिब सवा ४ बजे पुग्नु भएको थियो ।
आयोजकले ५० हजारका लागि निमन्त्रणा गरेकामा चियापानमा ४० हजारको सहभागिता रहेको नेकपा निकट अखिल नेपाल टे«ड युनियन महासङ्घका अध्यक्ष विनोद श्रेष्ठले जानकारी दिनुभयो ।
उहाँले आयोजनाका लागि रु १० लाख रकम पेश्की निकासा गरिएको बताउनुभयो । चियापानमा सालको पाताको दुनामा निमकिन, कचौरी, केरा, लड्डु राखिएको थियो । चिया र पानीका लागि अलग्गै प्रबन्ध थियो ।
चियापानमा प्रमुख राजनीतिक दलका शीर्ष नेता, मन्त्रीगण, मुख्यमन्त्री, सांसद संवैधानिक अङ्गका पदाधिकारी, राष्ट्रसेवक, कूटनीतिक नियोगका प्रमुख तथा प्रतिनिधि, प्राज्ञहरु, कलाकार र सर्वसाधारणको सहभागिता थियो । चियापानमा काङ्ग्रेसका सभापति तथा पूर्वप्रधानमन्त्री देउवासहित काङ्ग्रेस नेता प्रकाशमान सिंह, गोपालमान श्रेष्ठ, राष्ट्रिय जनता पार्टीका नेता महन्थ ठाकुर, भारतीय कम्युनिष्ट पार्टीका महासचिव सीताराम यचुरीलगायत नेताको सहभागिता थियो ।
