काठमाडौं । साताको दोस्रो कारोबार दिन मंगलबार नेपाल स्टक एक्सचेञ्ज (नेप्से) परिसूचक सामान्य अंकले घटेर बन्द भएको छ। अघिल्लो दिन सोमबार ८३ अंकले उकालो लागेको बजार मंगलबार भने झिनो गिरावटसँगै बन्द भएको हो।
यस दिन नेप्से परिसूचक २.६१ अंकले घटेर २७५७.४० विन्दुमा झरेको छ। त्यस्तै, सेन्सेटिभ इण्डेक्स ०.७८ अंकले घट्दा फ्लोट इण्डेक्स ०.२७ अंक र सेन्सेटिभ फ्लोट इण्डेक्स ०.३२ अंकले ओरालो लागेको छ।
कारोबार रकममा पनि उल्लेख्य कमी आएको छ। सोमबार १० अर्ब ९२ करोड रुपैयाँ बराबरको कारोबार भएको बजारमा मंगलबार ३४५ वटा स्टकको ८१ हजार ५८२ पटकको कारोबारमा ६ अर्ब ७३ करोड ७१ लाख ४८ हजार रुपैयाँ बराबरको १ करोड ७४ लाख ६ हजार कित्ता शेयर खरिदबिक्री भएको छ।
यस दिन ६ वटा कम्पनीको शेयर सकारात्मक सर्किट लेभलमा कारोबार भएका छन्। जसमा भुजुङ्ग हाइड्रोपावर, सुपर खुदी हाइड्रोपावर, श्वेतगंगा हाइड्रोपावर एण्ड कन्स्ट्रक्सन, रिज लाइन इनर्जी, सूर्यकुण्ड हाइड्रो इलेक्ट्रिक र होटल फरेष्ट इन रहेका छन्। साथै, त्रिशुली जलविद्युत कम्पनी को शेयरमूल्य ८.५ प्रतिशतभन्दा बढीले बढेको छ।
यता, एनआईबिएल ग्रोथ फण्ड को इकाईमूल्य सर्वाधिक ७.०८ प्रतिशतले घटेको छ भने अन्य घटेका स्टकहरूको गिरावट ४ प्रतिशतभन्दा कम रहेको छ।
कारोबार रकमका आधारमा ङादी ग्रुप पावर शीर्ष स्थानमा रहेको छ। सो कम्पनीको २४ करोड २२ लाख ६१ हजार रुपैयाँ बराबरको शेयर कारोबार भएको छ। त्यस्तै, रिलायन्स स्पिनिङ्ग मिल्स को कारोबार रकम २४ करोड रुपैयाँ नाघेको छ भने आँखु खोला जलविद्युत कम्पनी को साढे २३ करोड रुपैयाँभन्दा बढीको शेयर किनबेच भएको छ।
उपसमूहगत रूपमा हेर्दा १३ मध्ये ४ उपसमूहको परिसूचक बढेको छ भने ९ उपसमूह घटेका छन्। यस दिन होटल तथा पर्यटन उपसमूह सर्वाधिक १.०८ प्रतिशतले बढ्दा बैंकिङ्ग, हाइड्रोपावर र अन्य उपसमूह सामान्य बढेका छन्। यता, व्यापार उपसमूहको परिसूचक भने सर्वाधिक १.८८ प्रतिशतले घटेको छ।
