काठमाडौँ । संयुक्त राज्य अमेरिका ले मोजतबा खामेनेई सहित इस्लामिक रिभोलुसनरी गार्ड कोर (आईआरजीसी) का वरिष्ठ नेताहरूको गतिविधिबारे सूचना दिनेलाई १ करोड अमेरिकी डलरसम्म पुरस्कार दिने घोषणा गरेको छ।
अमेरिकी विदेश मन्त्रालय ले जारी गरेको सूचनामा आईआरजीसीका शीर्ष नेताहरूको गतिविधिसम्बन्धी जानकारी उपलब्ध गराउने व्यक्तिलाई रिवार्ड्स फर जस्टिस कार्यक्रम अन्तर्गत इनाम प्रदान गरिने उल्लेख गरिएको छ।
मन्त्रालयले ती व्यक्तिहरूले विश्वभर आतंकवादी गतिविधि योजना, संगठन र सञ्चालन गर्ने आईआरजीसीका विभिन्न संरचनालाई निर्देशन र नियन्त्रण गर्ने भूमिका खेलेको आरोप लगाएको छ।
सूचीमा रहेका प्रमुख व्यक्ति
अमेरिकाले सार्वजनिक गरेको सूचीमा १० जना इरानी अधिकारी समावेश गरिएको जनाइएको छ। तीमध्ये:
मोजतबा खामेनेई — इरानका सर्वोच्च नेता
अली असगर हेजाजी — सर्वोच्च नेताको कार्यालयका उपप्रमुख
यह्या रहिम सफावी — सैन्य सल्लाहकार
अली लारिजानी — सर्वोच्च राष्ट्रिय सुरक्षा परिषद्का सचिव तथा सल्लाहकार
इस्कन्दर मोमेनी — गृहमन्त्री
इस्माइल खातिब — गुप्तचर तथा सुरक्षा मन्त्री
यसका अतिरिक्त रक्षा परिषद्का सचिव, सर्वोच्च नेताका अन्य सल्लाहकार तथा आईआरजीसीका कमान्डरहरू पनि सूचीमा समावेश गरिएको जनाइएको छ।
अमेरिकी विदेश मन्त्रालयले सम्भावित सूचनादातालाई टिओआर आधारित टिपलाइन वा सिग्नल जस्ता इन्क्रिप्टेड प्लेटफर्ममार्फत सूचना पठाउन आग्रह गरेको छ।
यो घोषणा अमेरिका र इजरायल ले हालै इरान का लक्ष्यहरूमा गरेको सैन्य आक्रमणपछि मध्यपूर्वमा तनाव बढिरहेको समयमा आएको हो।
गत फेब्रुअरी २८ मा भएको बम विस्फोटमा अली खामेनेई मारिएपछि उनका छोरा मोजतबा खामेनेई नयाँ सर्वोच्च नेताका रूपमा नियुक्त भएका हुन्। उनी सोमबार सर्वोच्च नेता नियुक्त भए पनि सार्वजनिक रूपमा भने हालसम्म नदेखिएको इरानी सञ्चारमाध्यमहरूले जनाएका छन्।
बिहीबार सरकारी टेलिभिजनमार्फत उनका सन्देश पढेर सुनाइएको थियो। सन्देशमा उनले ‘रगतको बदला रगतले लिने’ चेतावनी दिँदै स्ट्रेट अफ होर्मुज बन्द गर्ने नीति जारी रहने बताएका थिए।
अन्तर्राष्ट्रिय सञ्चारमाध्यमका अनुसार फेब्रुअरी २८ मा अमेरिका र इजरायलले गरेको संयुक्त हमलामा उनी घाइते भएका थिए। उक्त हमलामा उनको खुट्टा भाँचिएको र अनुहारमा पनि चोट लागेको समाचार सार्वजनिक भएको छ।
