ललितपुर । नेपाली कांग्रेसको केन्द्रीय कार्यसमिति बैठक आज पनि जारी रहने भएको छ । बैठक पार्टी केन्द्रीय कार्यालय बीपी स्मृति भवन, सानेपामा दिउँसो १ बजेबाट सुरु हुनेछ ।
गत असोज २८ गतेदेखि सुरु भएको बैठकमा भदौ २३ र २४ गतेका जेनजी आन्दोलन, अन्तरिम सरकारको गठन, प्रतिनिधिसभा विघटनपछि उत्पन्न राजनीतिक परिस्थिति तथा त्यसमा कांग्रेसको भूमिकाबारे केन्द्रित छलफल भइरहेको छ ।
पार्टीका प्रवक्ता प्रकाशशरण महतका अनुसार, आजको बैठकमा धारणा राख्ने केन्द्रीय सदस्यहरूले आगामी निर्वाचनपछि मात्रै महाधिवेशन गर्नु उपयुक्त हुने सुझाव दिएका छन् ।
हिजोको बैठकमा केन्द्रीय सदस्य मानबहादुर विश्वकर्मा, कृष्णचन्द्र नेपाली पोखरेल, बहादुरसिंह (लामा) तामाङ, रमा कोइराला, टेकप्रसाद गुरुङ, राजेन्द्रकुमार केसी, रङ्गमती शाही, मदनकृष्ण श्रेष्ठ, सीताकुमारी राना, विद्यादेवी तिमिल्सिना, शान्ति परियार विक, लक्ष्मी खतिवडा, आमन्त्रित केन्द्रीय सदस्य पुष्पराज पराजुली, तथा आमन्त्रित प्रदेश सभापति इन्द्रबहादुर बानियाँ (बागमती) र अमरसिंह पुन (लुम्बिनी)ले आ–आफ्नो धारणा व्यक्त गरेका थिए ।
