काठमाडौँ : काठमाडौँ महानगरपालिकाले ४५ वर्षमाथिका अनुभवी र परिपक्व नागरिकको ज्ञान, सीप र क्षमतालाई सहर विकासमा उपयोग गर्ने उद्देश्यले ‘सिल्भर भोलिन्टियर कार्यक्रम’ सुरु गरेको छ ।
विभिन्न क्षेत्रमा दीर्घ अनुभव बटुलेका नागरिकलाई अवकाशपछि पनि समाज र देशको विकासमा योगदान दिने अवसर प्रदान गर्न यो कार्यक्रम ल्याइएको काठमाडौँ महानगर सहरी योजना आयोगका सचिवालय सदस्य विवेक बास्तोलाले जानकारी दिए ।
उनका अनुसार, जागिर वा व्यवसायबाट अवकाश लिएपछि पनि समाजका लागि केही गर्ने सोच भएका नागरिकलाई महानगरसँग हातेमालो गर्न प्रोत्साहित गर्न यो कार्यक्रम उपयोगी हुनेछ ।
कार्यक्रमअन्तर्गत सहभागी स्वयंसेवकहरूले शिक्षा, स्वास्थ्य, सरसफाइ, वातावरण, प्रशासन, सहरी विकास, सम्पदा संरक्षणलगायतका क्षेत्रमा महानगरसँग सहकार्य गर्दै सेवा दिन सक्नेछन् । यसका लागि महानगरले ‘कामपा–सिल्भर–भोलिन्टियर–कार्यविधि’ बमोजिम आवेदन खुला गरेको छ ।
कार्यविधिअनुसार, सहभागी हुनका लागि निम्न योग्यता आवश्यक छन्:
नेपाली नागरिक, गैरआवासीय नेपाली वा कानुनी स्वीकृति प्राप्त विदेशी नागरिक हुनुपर्ने।
उमेर ४५ वर्ष पूरा भई ७४ वर्ष ननाघेको हुनुपर्ने।
कुनै क्षेत्रमा सरकारी, निजी वा गैरसरकारी संस्थामा कम्तीमा २० वर्ष काम गरेको हुनुपर्ने।
हप्तामा न्यूनतम पाँच घण्टा सेवा दिन तयार हुनुपर्ने।
शारीरिक तथा मानसिक रूपमा सक्षम र पूर्णरूपमा स्वयंसेवा गर्न इच्छुक हुनुपर्ने।
महानगरभित्रका क्षेत्रहरूमा गई जिम्मेवारी इमान्दारीपूर्वक निर्वाह गर्न सक्ने हुनुपर्ने।
कुनै फौजदारी अभियोगमा कसुरदार नठहरिएको हुनुपर्ने।
महानगरका अनुसार, यस कार्यक्रमले एकातिर परिपक्व नागरिकको अनुभव र सीपलाई सहर र देश विकासमा उपयोग गर्न सहयोग गर्नेछ भने अर्कातिर स्वयंसेवकहरूलाई समाजसेवाको माध्यमबाट सन्तुष्टि र अवसर प्रदान गर्नेछ ।
कार्यक्रमका बारेमा थप जानकारीका लागि इच्छुक व्यक्तिहरूले ९८४८०१८२१५ नम्बरमा सम्पर्क गर्न सक्ने महानगरले जनाएको छ ।
