काठमाडौं। जल तथा मौसम विज्ञान विभाग अन्तर्गतको मौसम पूर्वानुमान महाशाखाका अनुसार हाल देशभर मनसुनी वायु सक्रिय रहेको छ। यसको प्रभावस्वरूप अधिकांश स्थानमा आंशिकदेखि सामान्य बदलीको अवस्था रहनेछ।
देशका पहाडी भू–भागका केही स्थानहरूमा र बाँकी भू–भागका थोरै ठाउँमा मेघगर्जन र चट्याङसहित हल्कादेखि मध्यम वर्षाको सम्भावना रहेको महाशाखाले जनाएको छ।
आज दिउँसो कोशी, बागमती, गण्डकी, लुम्बिनी र सुदूरपश्चिम प्रदेशका एक/दुई स्थानहरूमा भारी वर्षा हुन सक्ने सम्भावना रहेको छ। साथै, उच्च पहाडी र हिमाली क्षेत्रका केही स्थानमा हल्का वर्षा तथा हिमपातको सम्भावना पनि रहेको छ।
त्यस्तै, रातिको समयको मौसम पूर्वानुमान अनुसार पनि देशभर आंशिकदेखि सामान्य बदलीको अवस्था रहनेछ। कोशी, मधेश, बागमती, गण्डकी, लुम्बिनी र सुदूरपश्चिम प्रदेशका केही स्थानहरूमा भारीदेखि धेरै भारी वर्षाको सम्भावना देखिएको छ।
उच्च पहाडी र हिमाली क्षेत्रमा भने हल्का वर्षा र हिमपात हुन सक्ने सम्भावना कायम रहेको महाशाखाले स्पष्ट पारेको छ। मौसममा देखिएको यो परिवर्तनसँगै महाशाखाले सतर्कता अपनाउन आग्रह गरेको छ।
