काठमाडौं । गृह मन्त्रालयले विभिन्न जिल्लाका प्रमुख जिल्ला अधिकारी (प्रजिअ)सहित सहसचिव र उपसचिव तहका कर्मचारीको सरुवा गरेको छ। मन्त्रालयले भदौ १८ गतेको निर्णयअनुसार जिल्ला प्रशासन कार्यालय तथा मन्त्रालयमा कार्यरत कर्मचारीको जिम्मेवारी हेरफेर गरेको हो।
मन्त्रालयका अनुसार सहसचिव श्रवणकुमार पोखरेललाई झापाको प्रमुख जिल्ला अधिकारी र सल्यानका प्रजिअ महेन्द्रकुमार सापकोटालाई सुर्खेतको प्रजिअमा सरुवा गरिएको छ।जाजरकोटका प्रजिअ खडानन्द अधिकारीलाई बारा र बाराका प्रजिअ धर्मेन्द्रकुमार मिश्रलाई गोरखाको प्रमुख जिल्ला अधिकारीको जिम्मेवारी दिइएको छ।
गोरखाका प्रजिअ तुलसीबहादुर श्रेष्ठलाई गृह मन्त्रालय, खोटाङकी प्रजिअ रेखा कँडेललाई दोलखा तथा दोलखाका प्रजिअ हरिप्रसाद घिमिरेलाई गृह मन्त्रालयमा सरुवा गरिएको छ।
त्यस्तै, रौतहटका प्रजिअ दिनेश सागर भुसाललाई गृह मन्त्रालय, रोल्पाका प्रजिअ गंगाबहादुर क्षेत्रीलाई पर्वत र पर्वतका प्रजिअ लक्ष्मीप्रसाद पौडेललाई रौतहटको जिम्मेवारी दिइएको छ।
अध्यागमन कार्यालय, त्रिभुवन अन्तर्राष्ट्रिय विमानस्थलमा कार्यरत वेदराज फुयाँललाई डडेलधुराको प्रजिअ बनाइएको छ भने डडेलधुराका प्रजिअ अमरबहादुर वलीलाई बाँकेको सहायक प्रजिअमा सरुवा गरिएको छ।
गृह मन्त्रालयका उपसचिव कुलशेखर अर्याललाई भोजपुरको प्रजिअ, बाँकेका सहायक प्रजिअ महेशकुमार गुरुङलाई खोटाङको प्रजिअ, उपसचिव बन्दना केसीलाई सल्यानको प्रजिअ तथा गणेश गैरैलाई म्याग्दीको प्रजिअको जिम्मेवारी दिइएको छ।
यसैगरी, बागलुङका सहायक प्रजिअ नवराज बराललाई जाजरकोटको प्रजिअका रूपमा पठाइएको छ। अध्यागमन कार्यालय, गौतमबुद्ध अन्तर्राष्ट्रिय विमानस्थल भैरहवाका प्रमुख अध्यागमन अधिकृत बलराम निरौलालाई गृह मन्त्रालयमा ल्याइएको छ।
गृह मन्त्रालयका सहसचिव ऋषिराम तिवारीलाई लागूऔषध नियन्त्रण विभाग, काठमाडौंमा सरुवा गरिएको छ। यस्तै, उपसचिव कुलशेखर अर्याललाई जिल्ला प्रशासन कार्यालय भोजपुरको प्रमुख जिल्ला अधिकारीको जिम्मेवारी दिइएको छ।
