काठमाडौँ । एसियाली खेलकुद छनोटअन्तर्गत जारी समूह चरणको पहिलो खेलमा नेपालले चीनसामु जितका लागि ३१४ रनको विशाल लक्ष्य प्रस्तुत गरेको छ।
सिंगापुरस्थित सिंगापुर नेसनल क्रिकेट स्टेडियम मा चीनले टस जितेर फिल्डिङ रोजेपछि ब्याटिङमा उत्रिएको नेपाल राष्ट्रिय क्रिकेट टोली ले निर्धारित २० ओभरमा २ विकेट गुमाएर ३१३ रनको विशाल योगफल तयार पारेको हो।
यो नेपालले टी–२० अन्तर्राष्ट्रिय क्रिकेटमा बनाएको संयुक्त रूपमा दोस्रो ठूलो स्कोर हो। यसअघि सन् २०२३ मा एसियाली खेलकुद २०२३ अन्तर्गत मंगोलियाविरुद्ध पनि नेपालले ३ विकेटको क्षतिमा ३१४ रन बनाएको थियो।
नेपालको विशाल स्कोरमा ओपनर कुशल भुर्तेल ले विस्फोटक शतकीय इनिङ्स खेले। उनले ४३ बलमा ५ चौका र १६ छक्काको मद्दतमा १२९ रन बनाए। भुर्तेलले केवल ३५ बलमै शतक पूरा गरेका थिए।
दोस्रो विकेटका लागि भुर्तेल र कुशल मल्ल बीच १७५ रनको साझेदारी भयो, जुन नेपालको टी–२० अन्तर्राष्ट्रिय क्रिकेट इतिहासमा दोस्रो विकेटका लागि सबैभन्दा ठूलो साझेदारी बनेको छ।
यसअघि सन् २०१९ मा सिंगापुरमै पारस खड्का र आरिफ शेख ले सिंगापुरविरुद्ध दोस्रो विकेटका लागि अविजित १४५ रनको साझेदारी गरेका थिए।
समग्रमा भने यो नेपालका लागि कुनै पनि विकेटमा भएको दोस्रो ठूलो साझेदारी हो। सबैभन्दा ठूलो साझेदारी सन् २०२३ को एसियाली खेलकुदमा रोहित पौडेल र कुशल मल्लले मंगोलियाविरुद्ध तेस्रो विकेटका लागि बनाएको १९३ रनको साझेदारी हो।
कुशल भुर्तेलले अर्को कीर्तिमान पनि आफ्नो नाममा लेखाएका छन्। उनी टी–२० अन्तर्राष्ट्रिय क्रिकेटमा नेपालका लागि सर्वाधिक छक्का प्रहार गर्ने खेलाडी बनेका छन्। ७७ खेलमा उनले ९९ छक्का प्रहार गरेका छन्। यसअघि यो कीर्तिमान दीपेन्द्रसिंह ऐरी को नाममा थियो, जसले ८९ छक्का प्रहार गरेका छन्।
नेपालका लागि कप्तान रोहित पौडेल १९ बलमा ५ चौका र ६ छक्कासहित ६९ रनमा अविजित रहे भने कुशल मल्ल ४७ बलमा ८ चौका र ५ छक्काको सहयोगमा ९५ रनमा अविजित रहे।
नेपालले प्रस्तुत गरेको ३१४ रनको लक्ष्य पछ्याउन चीनलाई टी–२० अन्तर्राष्ट्रिय क्रिकेट इतिहासकै कठिन चुनौतीमध्ये एक सामना गर्नुपर्ने भएको छ।
