काठमाडौं । इरान र अमेरिका बीच भइरहेको शान्ति वार्ताको पहिलो चरण सम्पन्न भएको छ। BBC का अनुसार हिजो दिउँसोदेखि सुरु भएको वार्ता रातभर चलेर पहिलो चरण टुंगिएको हो।
पहिलो चरणमा भएका छलफलका विषयहरू हाल गोप्य राखिएको जनाइएको छ। वार्तामा ठोस सहमति भएको वा अर्को चरणमा जाने विषय अझै स्पष्ट भइसकेको छैन। दुवै पक्षले आफ्ना अडान कडाइका साथ प्रस्तुत गरेकाले प्रगति कति भयो भन्नेबारे सार्वजनिक जानकारी आएको छैन।
मध्यपूर्वमा जारी तनाव अन्त्यका लागि इस्लामाबाद मा पाकिस्तान को मध्यस्थतामा भइरहेको यो वार्तालाई अन्तर्राष्ट्रिय समुदायले चासोका साथ हेरिरहेको छ। यसलाई क्षेत्रीय शान्ति स्थापनातर्फको महत्वपूर्ण पहलका रूपमा लिइएको छ।
यसअघि शहबाज सरिफ को कार्यालयले वार्ता सुरु भएको पुष्टि गरेको थियो। वार्ताअघि इरानी र अमेरिकी प्रतिनिधिमण्डलले प्रधानमन्त्री सरिफसँग छुट्टाछुट्टै भेट गरेका थिए। वार्ताका मुख्य एजेन्डामा इरानको परमाणु कार्यक्रम, होर्मुज जलमार्ग, लेबनन मा देखिएको तनाव लगायतका विषय समेटिएका छन्।
यसैबीच, अमेरिकाले रणनीतिक जलमार्ग सुरक्षित बनाउने प्रयास तीव्र पारेको दाबी गरेको छ। डोनाल्ड ट्रम्प ले सामाजिक सञ्जालमार्फत इरानले युद्धमा ठूलो क्षति व्यहोरेको उल्लेख गरेका छन्।
ट्रम्पका अनुसार होर्मुज जलमार्गमा इरानी विस्फोटक सामग्री बिछ्याइएको कारण विश्वको करिब २० प्रतिशत कच्चा तेल ढुवानी हुने उक्त मार्ग अझै जोखिममा रहेको छ।
