काठमाडौं । अर्जेन्टिनाका कप्तान लियोनल मेसीले फिफा विश्वकप–२०२६ अन्तर्गत इजिप्टविरुद्धको खेलमा एकैसाथ दुई ऐतिहासिक कीर्तिमान कायम गरेका छन्। यद्यपि उनले यस प्रतियोगितामा लगातार दोस्रो पटक पेनाल्टी गुमाउँदै एउटा अनिच्छित रेकर्ड पनि आफ्नो नाममा लेखाएका छन्।
गएराति इजिप्टविरुद्ध एक गोल गरेका मेसी विश्वकप–२०२६ मा हालसम्म ८ गोलसहित सर्वाधिक गोलकर्ता बनेका छन्। यससँगै उनले विश्वकप इतिहासमा आफ्नो सर्वाधिक गोलकर्ताको कीर्तिमानलाई थप मजबुत बनाएका छन्।
इजिप्टविरुद्धको गोलसँगै मेसीको विश्वकपमा कुल गोल संख्या २१ पुगेको छ, जसले उनलाई प्रतियोगिताको इतिहासकै सर्वाधिक गोलकर्ता बनाएको छ। यति मात्र होइन, उनी लगातार नौ विश्वकप खेलमा गोल गर्ने पहिलो फुटबलर बनेर अर्को ऐतिहासिक उपलब्धि पनि आफ्नो नाममा लेखाउन सफल भएका छन्।
यद्यपि, यो खेलमा मेसीले एउटा अवाञ्छित रेकर्ड पनि बनाएका छन्। उनले जारी विश्वकपमा पाएका दुवै पेनाल्टी अवसरलाई गोलमा परिणत गर्न सकेका छैनन्। इजिप्टविरुद्धको खेलमा उनको पेनाल्टी प्रहार गोलरक्षकले बचाएका थिए। यसअघि समूह चरणमा अष्ट्रियाविरुद्ध पनि उनी पेनाल्टीमा असफल भएका थिए।
पेनाल्टी गुमाए पनि मेसीले त्यसको प्रभाव खेलमा पर्न दिएनन्। दोस्रो हाफमा उनले बराबरी गोल गर्दै अर्जेन्टिनाको ऐतिहासिक पुनरागमनमा महत्वपूर्ण भूमिका खेले। अन्ततः अर्जेन्टिनाले २–० ले पछि परेको अवस्था उल्टाउँदै इजिप्टलाई ३–२ ले हराएर क्वार्टरफाइनलमा स्थान सुरक्षित गरेको थियो।
